February 8, 2024 (Rauthla) : Vawiin khan Lairam Isua Krista Baptist Kohhran Assembly Committee Room-ah Rev. B. Zazawna Lai, General Secretary, LIKBK kaihhruainain Lawngtlai Council Venga khawsa Myanmar Refugee te khawsak dan tur chungchangah LIKBK Assembly hruaitute, Council Veng Village Council te leh YLA Council Veng Branch ten Joint meeting an nei.
Vawiin Joint Meeting-ah hian January 25, 2024 a tualthatna thleng chungchangah Council Veng VC leh YLA Branch ten an veng chhunga raltlante him zawka an awm theihna tur dan an siam chungchangah LIKBK Assembly hruaitute nen Joint meeting hi neih a ni a. Raltlante kan ramah him leh thlamuang taka an awm theih dan tur kawng te pawh an sawi ho a ni.
LIKBK Assembly hruaitute hian Myanmar raltlante theihtawpa an lo chhawmdawl dan te leh an puala Chin Refugee Committee din a nih thu te an tarlang a. Kohhranin a enkawl a nih avangin an thlarau nun an ngaihpawimawh thu te, an taksa hriselnate pawh kawng hrang hrang an ngaihtuah thin thu te pawh an tarlang bawk a. Assembly hruaitute chuan Myanmar raltlante chu khawtlang hruaitute’n theihtawp chhuaha an lo enkawlna ah lawmthu an sawi bawk a ni.
LIKBK Assembly te chuan tunah hian Bawm leh Khumi raltlante pawh theihtawp chhuaha an enkawl thu leh Khumi raltlante tan pawh Buhfai bag 97 tunhnaia an sem chhuah thu pawh an sawi lang bawk a ni.
Council Veng VC leh YLA Branch te hian an veng chhunga raltlante chu thlamuang tak a an awm theihna tur leh an khawsak nungphungah pawh awm dan an fimkhur a, midangte tan hnawksak ni lova, tha taka an awm theihna tura dan an siam chu a tul anga ennawn an tum thu an sawi lang bawk a ni.
Post a Comment