Kum 2024-25 Budget Thlirvelna - I By Hrahsel Val

 Kum 2024-25 Budget Thlirvelna - I

Pu Lalduhoma chuan a tum khatna atan Mizoram budget tur a pharh ta a, kum 2024-2025 budget tur chu cheng vbc. 14,412.12 a ni. Sorkar hnathawk hlawh, pension hlawh, inrelbawlna, medical reimbursement etc. (revenue expenditure) a hniam deuh tawh ang tia ngaihtuahna ka lo sèn laiin, kum hmasa aiin a sang leh ta zawk tlat.

Kan budget thar tur han thlir hian Mizoramin hma kan sawn dàwrh dawn lo ti ila, kan sawi sual tam lutuk loin ka ring. Kan leiba a tlahniam zawk tur erawh thil lawmawm tak a ni awm e. Hmasawnna liantham kan nei lo a nih pawhin sorkarin a tum anga insawhngheh kuma a hmang a nih erawh chuan, nakin zel atana kan ram tana tha tur a nih avangin a lawmawm lamah a ngaih theih awm e.

Revenue expenditure :

Budget pharh a nih reng rengin keichuan ka ngaihven ber chu revenue expenditure hi a ni ziah. Ngaihven zawng erawh a inang kher lo ang. Mizoram mipui hmun lia thena hmun khat pawh tling lo turin kan budget atanga a chanve aia tam daih an chang thin hi chu lungawi a har ka ti thin.

Chutihrual erawh chuan, keini ang state sum thawhchhuah nei tlem tan chuan revenue expenditure hi a sang lo thei lo tih erawh ka pawm. Sorkar kum kal mek 2023-2024 ah hian kan revenue expenditure chu kan budget pumpui atangin 78.10% a ni, kum 2024-2025 ah erawh 82.97 ah a kai chho. Hmasawnna hnathawhna tur (capital expenditure) chu 17.03 chauh a ni.

Kan Chief Minister-in revenue expenditure a sàn chhana a sawi sorkar hnathawk hlawh pung, D.A. pung leh thil man sang zel hi kei chuan 100%-a pawm har ka ti a ni. Office expenditure-te huaisen takin tihniam ngamin, medical reimbursement leh travelling allowance etc. te khauh leh renchem lehzuala kalpuiin, privatisation lamte kalpui na ngam se, tun ai hian a hniam theiin ka ring tlat.

Kan revenue expenditure han thlir kir ta ila – 2019-20 ah 78.50%, 2020-21 ah 84.20%, 2021-22 ah 82.67%, 2022-23 ah 71.43%, 2023-24 ah 78.10% leh 2024-25 ah 82.97% a ni.

Sum thawh tur a tam ve deuh :

Kumin kan budget-a thil lawmawm em em chu kan budget pumpui atanga chhûta kan state-in sum kan thawh ve tur a pung hi a ni awm e.

Kan state-in budget-a sum kan thawh vena lian pahnih zinga pakhat - chhiah atanga sum hmuh (state own tax revenue) chu kum 2023-24 ah cheng vbc. 1,0840.30 ni tura kan inbeisei laiin, kum 2024-25 ah chuan cheng vbc. 1,312.42 hmuh beisei a ni a, 21% in a pung. Chhiah ni chiah lo investment on cash balance, interest receipt, mining activities, state lottery, tui leh electric bill etc. (state own non tax revenue) a kum 2024-25 a kan hmuh tura beisei chu vbc. 1,122.39 niin, kum 2023-24 aiin 25% in a tam.

Keini ang state thawhchhuah nei tlem tan chuan central sorkar hi kan innghahna ber a ni lo thei lo a, kan innghahna ber pawh a la ni zel ang. Chutihrual erawh chuan kan budget-a kan sum thawh ve a tam telh telh dan kan ngaihtuah zel a ngai. Chuti a nih loh chuan kan sum dinhmun a chhe telh telh dawn.

15th Finance Commission-in Post Devolution Revenue Deficit Grant (PDRDG) atanga kan sum dawn tur a tihniam telh telh si. Kan sum hmuhna hnar lian ber dawttu PDRDG atanga kan sum hmuh a tlem telh telh chuan, kan budget a chhiat telh telhna chin pawh a awm lo thei lo ang.

16th FC hian PDRDG hi kan dawn zel turin thutlukna a siam ang em? A siam pawhin a tlem zawng zel a nih chuan kan hmabak a éng lo viau ang. Chuvangin, state-in kan budget-a kan tum ve a tam zel theihna atana theihtawp kan chhuah hi a tul tak meuh meuh a ni. PDRDG dawng thin state thenkhat dawng ta lo an awm tih pawh kan hre hlawm ngei ang.

PDRDG atang hian kum 2023-2024 a kan hmuh tur chu cheng vbc. 1,474 a nih laiin, kum 2024-25 ah chuan cheng vbc. 1,079 ah a tlahniam a, kum 2025-26 ah phei chuan cheng vbc. 586 chauh kan dawng tawh dawn.

Chutihrual erawh chuan, state-in sum a thawh ve tamtir kan tum luatah mipuite tana phurrit lam ngawt kan buaipui ang tih erawh thil hlauhawm a ni. Khawvel thang zelah mipuite pawhin chhiah tam zawk pek ve hi kan bat a nih rualin, mipuite phurrit lo tur lam - kan resource neih hmangtea sum lakluh dan kawng dap hi thil tul tak a ni awm e.

Kan state-in kan budget pum puia kan tum ve dan chu 2021-22 ah 14.35%, 2022-23 ah 11.93%, 2023-24 ah 17.24% leh 2024-25 ah 19.66% a ni.

Kan state sum hnar lian ber central-in chhiah a hmuh kan insem thin (share of central taxes) hi chuan hniam lam a pan lo turah ngai thung ang. Central-in chhiah a hmuh tlingkhawm atang hian state chan zat tur bithliah a ni thin. Central hian chhiah a hmu tam deuh deuh turah ngai ila, a bik takin Mizoram tan chuan central-in a hmuh tam zel hi duhthusam a ni takzet.

Leiba tihtlem tum a ni dawn :

Leiba zat tehna atana dik ber GSDP atanga chhuta leiba tam ber kan ni mek. Sorkar liamta khan sawi mawi tumna atana a figure-in leiba zat sawiin, India rama leiba nei tlem angin insawi mah se, leiba tam leh tam loh tehna dik ber chu GSDP atanga chhut hi a ni.

Kum 2023-24 ah chuan GSDP atanga kan leiba tura zat tura chhût chu 37.84% niin, India rama leiba ngah ber kan ni. Kum 2024-25 ah chuan GSDP atanga chhuta kan leiba zat tura chhût chu 29.22% niin, state dangten han chhût fel se pakhatna kan la ni zel dawn em tih a hriat ang. A figure chuan sorkar leiba zat zawng zawng tur chu cheng vbc. 14,034.76 a ni.

Tun tum kan budget-ah hian loh theih lohin leiba rulhna tur cheng vbc. 1,000 chuang dah a ngai a, keini ang cheng vbc. sing chuang awrh budget nei tan chuan a uiawm tham hle. Chuvangin, kan leiba titlem tura theihtawp kan chhuah zel hi a pawimawh takzet zet. Leiba lo chuan a awm theih hauh lo ang, chutihrual erawh chuan lei kan ba a nih pawh kan state tana tangkai tak turah chauh bat tawh ni se a duhawm hle.

Kum 2024-2025 hian sum puk tur cheng vbc. 697.69 in tihhniam a ni dawn a, hei hian hmasawnna hnathawh kawngah pawh nghawng chin a nei maithei. Chutihrual erawh chuan kan sum neih ang angte tangkai taka hman a nih chuan nghawng lian lutuk a nei loin a rinawm.

India rama leiba ngah ber ni chunga kan state dinhmun hi a lungawithlak kan ti a nih chuan bat zel a pawi awm lo e, chuti a nih loh chuan kan leiba tihniam zawnga kan kal zel a pawimawh awm e. A nih loh chuan nakinah leiba thangah kan awk nghet ang a, kan budget hi leiba rulhna atan leh revenue expenditure deuh vek a ni palh ang tih a hlauhawm.

Kum 2023-2024 budget-ah leiba zat tura chhut chu cheng vbc. 2,689.72 niin, kum 2024-25 ah chuan cheng vbc. 1,992.03 a ni.

Hand Holding Policy :

Congress an sorkar laiin NLUP kan hria a, MNF sorkarah SEDP kan hre leh a, ZPM an han sorkar leha an auhla ring ber chu 'Hand Holding Policy' hi a ni awm e.

Ka beisei aiin an policy pui bera kan ngaih Hand Holding Policy-ah hian sum an dah tlem. Hand Holding Policy-ah hian cheng vbc. 200 dah a ni a, tun sorkar kum kal meka an dah cheng vbc. 110 nen (an la hmang loin ka hria) he policy atan hian cheng vbc. 310 an dah kan ti thei awm e.

Hand Holding Policy hnuaiah hian thlai thar leina tur dah a ni a, hlawhtling tuma theihtawp chhuahte ho khaichhuahna tur pawh a huam vek a ni. Chief Minister sawi danin, rural chauh ni lo, urban pawh cheng vbc. 200 an dah hian a huam vek. Chuvangin, sorkar kal tawhte'n an policy pui ber atana sum an dah thin anga chhut chuan sum hi an dah tlem ka ti.

Chutihrualin, engti ang chiahin nge he policy hi kalpui a nih dawn kan la hre ve tak tak lo a, thlai thar hi lei kher a ngai lo thei a, chuvangin cheng vbc. 200 (kum kal meka dah nen cheng vbc. 310) hi a lo tawk viau maithei.

He policy hi mipuite hian kan chìk dawn a, SEDP leh NLUP-te nen pawh tehkhin a hlawh ngeiin ka ring. He sorkar hian a inzawrhna pui ber pakhat hand holding policy hi an sawi anga an hlawhtlinpui lo a, mipuiin kan chhawr lo a nih ngat chuan inthlan leh dawnah chuan an tan lawmna thlentu aiin, lungaihna thlentu a ni ngeiin a rinawm.

Health Care Scheme :

Mipuite ngaihven hlawh ber pakhat chu health care scheme hi a ni awm e. Health care scheme atan hian kum 2024-25 budget-ah cheng vbc. 20 dah a ni a, tun sorkar hian kum 2023-24 budget (revised estimate) ah cheng vbc. 40 a dah bawk.

RE-a health care atana dah cheng vbc. 40 hi hman a la ni lo niin ka hria a, mahse Health Minister thusawi atanga ka hriat thiam dan chuan hei hi kum 2023-24 ral hmain hman zawh a ni dawn.

Kum 2024-25 chhunga health care atan cheng vbc. 20 chauh dah a ni hi tlem viauin ka hria. Health care bill ba tam thinzia ngaihtuahin cheng vbc. 20 chauh dah a nih hi chuan, bill ba a awm leh nual dawn niin a lang.

Chutihlai hian ZPM sorkar hian health care scheme thar a duang mek a, chu chu a duan fel hunah sum a dah belh dawn pawh a ni mahna. Health care bill thar nghah nan bika cheng vbc. 20 hi dah a nih chuan a ziaawm deuh awm e.