February 14, 2024 (Rauthla) : Ram pum huapa Nurse hnathawk tha chawimawina Florence Nightingale Awardee 2008 Pi K. Lianchhingi (94), Lawngtlai-III chu vawiin dar 11:00am khan Lungleiah a boral a, naktukah Lawngtlai-III thlanmualah vuiliam a ni ang.
Pi K. Lianchhingi hian kum 1958 khan Nurse hna hi Kohhran (BCM) hnuaiah a thawk tan a, South Vanlaiphai bial Dispensary atangin kum 1972 ah Lawngtlai bial Dispensary-ah sawn a ni. Kum 1984-ah Sister-ah kaisangin, kum 1989 ah pension-in a chhuak. Nurse hna a thawh chhung hian naupiang 1300 a chhar a, hlam tang 30 siamremin a la chhuak, naupiang thei lo (Zai) 10 leh chhul tang 60 te a lo siam remin, a lo buaipui tawh a. Nurse hna a thawh chhung hian he hna hi a thawh that em avangin a naupan laia midang tanpuia Nurse ni tura a thinlunga thusawitu Florence Nightingale-i hming chawia Nurse thawk tha chawimawina India sorkar-in a pek thin Florence Nightingale Award chu May 12, 2008 khan New Delhi-ah India President Pratibha Patil kut atangin a dawng a ni.
Pi K. Lianchhingi hi mi taima tak a ni a, puantah leh laphiar te thiamin, kut hnathawh nuam timi a ni a, lekha chhiar leh ziah a peih hle a, MUP leh Kohhran chanchinbu hrang hrangah article te ziakin, Drama leh Skit te pawh a ziak nual bawk.
Rawngbawlna lamah mi mi duai lo tak niin, Girls Auxiliary, TKP hruaitu hmasa niin, kum 1965 ah Kohhran Rawngbawltuah thlan a ni a, A pension hnu 1990-1994 khan Evenglical Nurse Fellowship-ah Evangelist a ni a, he pawlah hian Secretary a ni bawk. BKHP leh MUP ah a sultu ber ber a ni.
Pi K. Lianchhingi hi kum 1930 ah Darzo khua Leithum hmunah a piang a. Kum 1959 ah Pu K. Vanmawia nen inneiin, fa 8 (Mipa 3 leh Hmeichhia 5) neiin, tu leh tuchhuan 42 a nei bawk.
Post a Comment