MZP PRESS RELEASE
Aizawl | Jan 25, 2024
Mizo Zirlai Pawl (MZP) General Headquarters, Aizawl chuan Siaha ECM Vaih-a cheng Zawasa tual thihna hi pawi a ti takzet a. Zawasa kalsan chhungkhat lainate MZP chuan a tawrhpui takzet a ni.
MZP chuan rang taka pawi khawihtute zawng chhuaka, hmalatute chungah lawmthu a sawi a. Hetianga rawng taka pawi khawihnaa mawhphurhtute hi, na taka an chungah hremna lekkawh turin thuneitute a ngen nghal a ni.
MZP chuan, he pawi khawihnaa inhnamhnawih te hi Rakhine (Arakan) lam mi, Zohnahthlâk raltlante nen inzawmna neilo niin a hria a. Arakan Army (AA) nena inkungkaihna nei nia hriat niin, Lawngtlai refugee camp-ah pawh an awm lova, Chakkhai lam tura zin veivak mai an nia hriat a ni bawk. Chuvangin, he thil thleng avang hian an taksa himna zawnga Mizoram a lo tlan, mipui, nunau pawi sawilo harsa tak takte hmer tel lo turin Mizoram mipuite a ngen a ni.
Mizo mipuiten, duat leh hmangaih taka kan unau raltlante kan enkawl mek laia, hetiang pawi khawihna lo thleng hi MZP chuan pawi a ti takzet a. Chutih laiin, Zofa pawh ni lo Rakhine (Arakan Army nia sawi bawk) te avanga kan unaute lakah kan thinrimna kan hrikthlak hi MZP chuan a hlau hle a. Kan unau raltlante pawh finkhur nana lo hmang turin kan ngen nghal a ni.
Sd/-
(CHINKHANMANGA THOMTE)
General Secretary
MZP General Headquarters, Aizawl
Post a Comment