Dr Vanlalthlana, School Education Minister chuan 'surprise visit' neiin Govt. Primary School-I, Sairang a tlawh

January 16.2024 (Tuesday) : Vawiin khan Dr Vanlalthlana, School Education Minister chuan 'surprise visit' neiin Govt. Primary School-I, Sairang a tlawh a, zirtirtute nen inkawmhona neiin school zirtirtuten an harsatna hrang hrangte Minister hnenah an thlen a ni.

Education Minister Dr. Vanlalthlana chuan thusawiin hnathawhna hi rawngbawlna kawng khat a nih angin ṭhahnemngai lehzual zel turin zirtirtute a fuih a. Zirtirtu tho a nih angin zirtirtu hna chu mahni tana hlawkna awmah ngaih loh pawhin, naupangin an hlawkpui a, an seilen zelnaah an hre reng ṭhin a, chu chuan ram leh hnam tan pawh rah ṭha a chhuah ṭhin a ni a ti. Sorkar tharah chuan zirna ngaih pawimawh a ni dawn a; zirna kalphung tur pawh an ruahman tawh thu a sawi bawk. Sawrkar hna thawk te, zirna lama tawn hriat ngah te leh mi ṭhahnemngaite thurawn bakah, zirna kaihhnawiha mi thiam zawkte zirchianna leh rawtna an ngaih pawimawh tur thu a sawi. Thawklehkhata danglamna thlen chu a harin a ṭhat lohna zawk te pawh a awm ṭhin a, sawrkar thar chuan a tahtawla zirna kalphung siamṭhat a tum a ni a ti a. Sawrkar chu zirna siamṭhat tumin a ṭang dawn a; zirtirtu, nu leh pa leh khawtlang pawh chumi tichak zual tura ṭan tlan vek a ṭul thu a sawi.

Zirlaite hmaah pawh thusawiin Minister chuan zirna hi mi puitling ni tura min chhertu pawimawh tak a nih avangin eng eizawnna kawng pawh zawh dawn ila, zirna hmanga inchher phawt chuan an hriam bik ang a; mihring nunah chuan a taima leh thawkrim apiang an dinchhuah ṭhin avangin ṭhahnem ngai taka lehkha zir turin zirlaite a fuih a ni.

School Education Minister hi Department Secretary Dr Lalzirmawia Chhangte leh Director Pu Lalsangliana ten an ṭawiawm a ni.