Lawngtlai dated 16th January 2024: Vawiin chawhma khan chhiatrupna thlen palh a chhanchhuah leh chhawmdawl hna thawk tur a che chhuak tur, Disaster Response Force-te tan 3rd Bn IR Headquarters, Thingkah ah Disaster Management & Rehabilitation Department bultumin Training buatsaih a ni a. Pu Benjamin Lalzama, Director, DM&R chuan Training hawnna hun hmangin Pu PC Lalchunglura, Joint Director (Ops) chuan hun a kaihruai a ni.
Pu Benjamin Lalzama, Director, DM&R chuan chhiatrupna leh vanduaina a thlen palh chang a hmuhnawm thlir a thlir mi thahnem tak an awm thin avangin chhanchhuahna hna thawh a tih khaihlak phah thin thu a tarlang a. Nunna hlu tak chhanchhuak tur chuan rang tak a chet lak a ngaih thu sawiin awmze nei leh sawt zawk a hmalak a pawimawh rualin mipui thunun thiam thleng a zir a tul thu a sawi. 3rd Bn IR Thingkah atang a Disaster Response Force training tur a tel te chu mipui rawngbawl tur a sawrkar rawih zing a Uniform ha a hnathawk thin an nih angin mipui pawhin an lak ah beiseina sang tak an neih thu a sawi a, mipui beiseina tihlawhtling tur leh thlamuantu ni tur chuan a tul hun ah chhanchhuah, venhim leh chhawmdawl hna rintlak tak an lan tir theih nan ‘Training for Mizoram State Disaster Response Force’ chu tangkai tak a hmang turin a chah. Pu Benjamin Lalzama chuan kan khawtlang leh kan district-a chhiatrupna thlen chang pawh a midang tanpui a thlamuantu ni thei tur a thiamna leh theihna inzirtir chu DM&R hnuai a Thingkah a Training buatsaih chhan pawimawh tak a nih thu Training hawnna ah hian a sawi bawk a ni.
Pu Jacob Hlychho, Commandant i/c, 3rd Bn IR chuan Siaha atangin mi 14, Lawngtlai tangin mi 14 leh Headquarters atangin mi 16 Training tur hian an tel thu sawiin heng mite hi Siaha leh Lawngtlai district chhung a chhiatrupna thlen palh pawh a che chhuak hmasa tur te an nih thu a sawi a. A tul hun ah chhanchhuah leh chhawmdawl hna tha tak a an thawh theih nan thiamna chhawrtlak zirchhuak ngei turin duhsakna a hlan a ni.
He hun ah hian Pu Samuel Lalmalsawma Sailo, SDC pawhin thu sawiin mahni nunna thap a chhanchhuah hna thawk thin te chu hmun tin ah mi ngaisan leh chawimawi an nih thin thu a tarlang a, chutiang a chawimawi tlak thiamna leh inpekna nei theuh turin Training-a tel te chu a chah a ni.
Dr. Lalrokima Chenkual, Deputy Director (Trg) chuan Training kalpui dan tur chungchang sawi zauna neiin Training hi kar 3 awh tur a nih thu leh hetiang ang training hi tum 3 buatsaihna a nih thu a sawi a. Chhanchhuah hna thawh nana hman thin hmanraw hrang hrang zirtirnate, Lirnghing, thlipui leh tui tla awm chang a hmalak dan tur leh him zawk a in sak dan ruahmannate inzirtir a nih tur thu a tarlang a. Pu Zothansanga Hmar, District Organiser chuan lawmthu sawina hun a hmang bawk a ni.
Post a Comment