Nov. 30, 2023 (Rauthla) : Vawiin khan Pu VL. Hmuaka kaihhruaina hnuaiah ni hnih awh tur Lai Autonomous District Council Thlasik thutkhawm chu LADC Session Hall-ah neih tan a ni.
Vawiin Thlasik thutkhawm ni khatnaah hian Pu L. Hranghluna, Ex-MDC, Pu VL. Rema, Ex-MDC te leh Pu F. Rohnuna, Ex-MDC te sunna hun hman hmasak a ni a. Pu L. Hranghluna hi kum 1938 ah a piang a, kum 1973 leh kum 1977 ah Lungpher bial atangin MDC atan thlantlin a ni. LADC ah Dy. Chairman leh Chairman hna te a chelh tawh a, kum 1997-2001 chhungin nominated MDC a ni a. Aug. 16, 2023 khan khan a boral. Pu VL. Rema hi kum 1948 ah Mampuiah a piang a, kum 1992-1997 chhungin nominated MDC niin, September 20, 2023 khan a boral. Pu F. Rohnuna hi kum 1951 ah Pangkhuaah a piang a. Kum 1988 khan nominated MDC ah ruat niin, kum 1992, 1997, 2002 ah te Pangkhua bial atangin MDC ah thlantlin a ni a, kum 2010 leh 2015 ah Sangau East bial atangin MDC ah thlantlin a ni bawk. LADC ah EM, Chairman leh CEM hna te a chelh tawh bawk a ni. September 19, 2023 khan a boral.
Zawhna hun hman niin, Pu V. Zirsanga, CEM LADC chuan Vawmbuk bialtu MDC Pu T. Zakunga zawhna chhangin, kum 2023-2024 budget salary head chuan thawktute hlawh a daih dawn loh thu a sawi a, a daih lohna chu cheng nuai 4099 leh 60,200 (Non-Salary-ah nuai 2899 leh 62,000, DCRG-ah nuai 1200) a ni, a ti a. Sum indaih lohna hi RE ah dil mek a ni a, a hlawhtlinna hmuh beisei a ni, a ti bawk.
South Lungpher MDC bialtu Pu C. Lalmuanthanga zawhna chhangin, Pu V. Zirsanga, CEM LADC chuan July 1, 2023 atanga November 30, 2023 chhungin LADC hnathawk Voluntary-a pension panga an awm thu sawiin, an post te hi promotion hmanga hnawhkhah a ni, a ti bawk.
Pu V. Zirsanga, CEM LADC in Sangau South bialtu MDC Pu K. Hre Kung zawhna chhangin, 11th LADC term hman mekah Official Bill paruk pass niin, bill pathum te chu Gazzetted a nih thu a sawi.
Lawngtlai AOC bialtu MDC Pu LR Dingliana zawhna chhangin Pu JB Vanhoy, EM/ic Social Welfare chuan Purchased of Tea Cup/Plate for free distribution to NGO hnuaiah 2023-2024 budget-a dah a nih angin Tea Cup/Plate lei a nih thu a sawi a, NGO te hnena sem turin CEM, EM, Chairman, Dy. Chairman, Ruling MDC leh Office Holder-te kuta dah a nih thu a sawi bawk.
Vawiin session-ah hian zawhna pali (4) awmin chhan vek a ni a, Session hi December 1, 2023 dar 10:30am a chhunzawm leh turin tihtawp a ni.
Post a Comment