September 21, 2023 : Art & Culture Minister Pu R. Lalzirliana Tawng humhalh tur chuan kan tawng kan zirchian a tul, a ti.
He thu hi vawiina Art & Culture Department, Govt. of Mizoram leh Mizo Academy of Letters, Aizawl tangkawp ten an buatsaih Mizo Tawng Zirhona Seminar -2023 Chanmari YMA Hall, Aizawla neih khuallian nia a hmanpuinaa a sawi a ni. Art & Culture Minister chuan Mizo Tawng hi kan tihchangtlun zel a, a hmangtute’n inang tlangin a hman dan tur dik taka hmang thei tura kan inzirtir a, kan inhrilhfiah a ngai a, Mizo Tawng tan hian theihtawp kan chhuah zel a ngai, a ti.
Pu R. Lalzirliana chuan “Tawng kan tih chuan, kan ka atanga ri kan tihchhuah, thil awmzia sawifiah nan leh kan rilru puan chhuah nana kan hman piahlamah, thil reng reng a nihna lantirtu a ni a. Tawngin a sawifiah zawh loh chu mihring tu tan mah hriatthiam tak tak ngaihna a awmlo thin; chuvangin tawng hi thil engkim nihna petu leh awmzia hrilhfiahtu a ni,” a ti.
Vawiin Mizo Tawng Zirhona Seminar Technical session-ah hian Pu Rozama Chawngthu paper buatsaih ‘Mizo Tawng Kalphung leh nihphung’ leh Dr. Darchuailova Renthlei, Asst. Secretary, MAL paper buatsaih ‘Mizo tawng kauchheh leh ziak dan dik’ tih thupui zirhona leh sawihona hun an hmang a. Pu K. Lalruala, Dy. Director, Art & Culture Deptt. Chuan seminar kharna hun hmangin college leh school naupang he seminar chhimtu zawng zawngte hnenah Certificate pek vek an ni bawk.
Post a Comment