September 9, 2023 : Nimin khan NGO Coordination Committee, Mizoram kaihhruaina hnuaiah Manipur-a Zohnahthlak pawl hrang hrang hruaitute an inhmukhawm a, kalkhawmte chuan pawl pakhata an inkhaikhawmna tur ‘Zo United’ tih hminga kalpui phawt an rel.
Central YMA Committee Room-a heng pawl hrang hrang aiawhte thukhawm chuan Manipur-a Zohnahthlakte zingah inpumkhatna leh thawhhona tha tak a awm theihna turin, tun dinhmunah ‘Zo United’ din phawt nise an ti a, September Ni 20, 2023 hma a hruaitu inruatfel an tum thu leh hruaitu inruatnaah hian hnam hrang hrang leh tribe aiawh pakhat theuh leh Indigenous Tribal Leaders Forum (ITLF), Committee on Tribal Unity (COTU) leh Hill Tribal Council (HTC) aiawh mipakhat theuh telin hruaitu inruatna hun hi hman nise an ti.
An thutkhawmnaah hian Manipura Zohnahthlak pawl hrang hrang aiawh 16 leh MLA 6 an tel a, Manipura Zo hnahthlak pawl hrang hrang inthlunzawmna tura pawl lo ding tawh, engemaw avanga ding mumal ta lo pahnih – Coordination Committee on Separate Administration Manipur (CORSAM) leh Joint Inpi Council (JIC) te chu thiah an rel bawk.
Post a Comment