CADC a Secretariat Office a thawk ten Pu F. Rohnuna sunna hun an hmang

September 21, 2023 (Rauthla) : Nimin khan Chakma Autonomous District Council Secretariat Office a thawk te chuan September 19, 2023 a chatuan ram pan ta, Pu F.Rohnuna pualin sunna hun an hmang.

Chakma Autonomous District Council a Chief Executive Member Pu Rasik Mohan Chakma chuan, Pu F. Rohnuna chu Lairam leh hnam tan mi ropui tak a ni a. Ram leh hnam a thawhhlawkzia te, a inpekna leh a ram mipuite’n hamthatna tura a inpekna ropui tak chu kan hre reng dawn ani, a ti.

Pu F. Rohnuna hi Lairam tan chauh hna a thawk a ni lova. Mizorama Autonomous District Council pathum ten hma kan sawn theihna turin theihtawp chhuahin hna a thawk a. A boral kan hriat khan min thawng em em mai a, Autonomous District Council te tan pawh channa nasa tak ani a, a inpekna hi kan hmuh hmaih hauh dawn lo ani, a ti bawk.

Pu Rasik Mohan Chakma, CEM CADC chuan Pu F. Rohnuna kalsan tak a chhungte chu thinlung taka an tawrhpui thu a sawi a. Heng hun harsat karah hian Pathian thlamuanna awmpuina chang ngei turin a duhsak bawk ani.

Nimina CADC in Pu F. Rohnuna sunna hun an hmannaah hian CADC a Executive Member te, Head of Department hrang hrang te leh staff te an tel ani.