Lawngtlai 27.07.2023 : Mizoram Legislative Assembly Inthlanpui 2023 lo awm tur atana kawngkal nei zawka voter-te zirtirna beihpui, Systematic Voters' Education and Electoral Participation (SVEEP) hma lakna chu Lawngtlai District chhungah District Election Office chuan ngawrh takin a kalpui chho mek a. Nimin khan MSSC 3rd Lai Cup 2023 kharna leh football final khelhna, CYLA Playground, Lawngtlaiah SVEEP signature campaign leh EVM demonstration buatsaih a ni.


3rd MSSC Lai Cup 2023 Organising Committee te thawhpuinaa Lawngtlai District Election Office-in SVEEP signature campaign an buatsaihah hian India khua leh tui electoral roll-a inziak lut tawhte tan "MLA Inthlanpui 2023-a vote thlak ngei tura intiamna" leh India khua leh tui kum la tling lo leh electoral roll-a la inziak lut lote tan "Kum an tlin huna electoral roll-a inziak lut ngei tura intiamna" hming an ziah hnanna tur signature board a hrang ve vea siam a ni a. Inkhel en tura kalte zingah MLA Inthlanpui 2023-a vote thlak ngei tura intiam thei leh kum tlin veleha electoral roll-a inziak lut nghal tura intiam theite chuan signature board-ah hming sign-in, an zavaiin mi 165-in hming an sign a. Heta hming sign-te zing aṭang hian a vannei mi 10 thlan chhuah niin, he'ng mi vannei thlan chhuahte hnenah hian ₹ 500/- ṭheuh hlan an ni a. Lawmman hi football final khelh zawhah sem zui nghal a ni.

Hemi hunah hian EVM hman dan zirtirna leh vote thlak chhin theihna (EVM demonstration) pawh buatsaih ni bawkin, mi ṭhahnem takin vote thlak chhinin, EVM hman dan entir an ni a. Inkhel en tura kal a duh apiang tana thla lak theihna tur, Voter ID Card anga siam photo booth hun a ni bawk.

SVEEP hma lakna hnuaiah hian khua leh tuite'n EVM hman dan an hriat chian a, an hman chhin theihna turin Lawngtlai Deputy Commissioner office complex-ah model polling station buatsaih a ni a. Hetah hian EVM demonstration leh voter-te'n zawhna an neih hrang hrangte hrilhfiahna kalpui a ni dawn a. Office hun chhungin a duh apiang tan pan theih reng a ni.

He'ng bakah hian Lawngtlai District chhunga India khua leh tui kum 18 tling chinte electoral roll-a an chuan vek theihna tur leh vote nei chinin inthlannaah dik leh thianghlim taka vote an thlak vek theihna turin hma lakna hrang hrang kalpui zel tura ruahman a ni bawk. 

Post a Comment

Powered by Blogger.