June 19, 2023 (Rauthla) : Vawiina MNF District Hqrs, Hnam Run inkhawmah Pu Sanghuliana Mualchin, MDC Lungtian Bialtu leh Vice Chairman Planning Board chuan political session thusawiin Politics hi vantlang mipui leh ram thatna tura rorelna leh inawpna tihna ani. A field a chengte pawm dan leh hman dan azirin, a thawh dan erawh a danglam thin ani, a ti.
Pu Sanghuliana Mualchin chuan, MNF Party lo pian chhan hi Nationalism vang ani a, hei hi party dang nen kan in anlohna leh kan danglamna ani, a ti a. MNF party hi “Mizote hnama dintu Pathian tih leh rawn chunga mizoram leh a mipuite rawngbawl a, hnam thil hlu leh ro te vawnghim tlat turin “Pathian leh kan ram tan” din niin, Kan innghahna lungphum, Mipui rorelna (Democracy), Sakhaw zalenna (secularism) leh Retheite chhanchhuahna leh intluktlanna (Socialism) thuthlungah hian kir leh ang u, tiin party mite a sawm ani.
Pu Sanghuliana Mualchin chuan, MDC term liam ta ah khan term tawp dawn ah Majority nei lo INC party MDC 12 ten politics nasa taka pawngsualin, Democracy an palzur a. Rorelna hi Pathian kut ah a awm tih an hre duh lova. Term tawp ah chuan party pahnih ah an kehdarh ta hial a, Kum 2020 MDC Election ah chuan a chi chhuah tur pakhat ve ve chiah an tling ta kha ani a. Pathian leh kan ram tan titu party te chuan Pathian leh a duhzawng dah hmasa zelin hnehna chu kan chang ta ani, a ti bawk.
Tun term ah Budget vawithum pharh a ni tawh a. Kan manifesto pawh tihhlawhtlin anih theihna turin kan hotute’n hma chak takin an la mek zel a. Sorkarna chelhtu kan nih ang takin Party mite pawh beidawng lovin, dawhthei takin, a neitu kan nih anga neitu rilru pu chungin nghak ila, kan hotute pawhin party aia ngaihpawimawh an nei lo tih hre reng bawk ila. LADC hi Pathianin kan ram leh hnam dinchhuahna atana min pek ani a, kan ram leh hnam, mipuite hmasawnna leh dinchhuahna, humhimna hi a thupui ber ani tih kan hriat reng pawh a tha hle ani, a ti bawk.
Tin, politics kan khelhna ah Social Media tun aia tangkai zawka hman kan thiam a tul hle a. Mahse, dawt hmanga midangte beihna atan ni lovin tangkai taka hman kan thiam a, kan taimak pawh a tul hle ani, a ti bawk.
Party mite pawhin hotute thuawih hi chakna ani, tih hria ila. Pathian in min pek kan hruaitute zai ngai chung zel a, ke kan pen pawh a ngai ani. Thuawihna hi rinawmna a ni a, mi rinawmna te chuan malsawmna pawh an chang thin ani, a ti a. Hotute thuawihlo an rinawm thei lo. Chutihrual chuan, hotu tha leh hruaitu tha awmna ah chuan thawhhona tha a awm a, mihring lawmna leh lungawina hi sum leh pai, nihna leh san a, ropuina ah ani vek lo, thil anih tur anga kalpui leh tih anih hian lungrualna leh lungawina a awm thin a. Kan LADC area ah MLA pakhat kan nei a, hei hi kan MLA ni a, duhkhawp lohna tam tak kan nei ang, thurawn kan pe ngam tur ani, a ti a. LADC a kan hotute lakah pawh in beisei kan phak lohna tam tak a awm ang. Sawrkar neitu kan nih angin, an hmalakna leh hnathawhte thlawp tlat ila, thurawn pe in, i backup tlat ang u, tiin party mite a sawm a. Kumin MLA Election lo awm turah pawh hnehna kan chan ngei theihna turin inpumkhatna tha tak nen i thawkho zel ang u, a ti bawk.
Post a Comment