June 6, 2023 (Rauthla) : Vawiin khan LADC Finance & Accounts department Building sak thar chu LADC Chief Executive Member Pu V. Zirsanga'n a hawng.
Hawnna inkhawm Pu H. Lalruatkima, Executive Secretary, LADC kaihhruaiah LADC CEM Pu V. Zirsanga chuan hmasawnna tam takin kan Council min nangching a, chung hmasawnna kalzelah chuan building tha tak tak pawh kan nei zel a, hei hi thawktute inpekna rah a ni, a ti a. LADC Finance & Accounts department building chu Mizoram sorkar emaw scheme dang atanga pawisa lo kal hmanga sak a ni lo tih sawiin, mipuiin rinawm taka chhiah an pek tlingkhawm atanga sak a nih thu a sawi.
Building hawngtu Pu V. Zirsanga chuan LADC huam chhunga mipuite hi kan awm mai mai lova, ram hmasawnna hna thawktu kan ni a, neitu thinlung pu chunga hnathawhnaah hian hmasawnna a awm thin, a ti a. LADC a thawktute pawh neitu thinlung pu zel turin leh hna an thawh chhunga hmasawnna hna tam tak hnutchhiah turin a chah a, Thawktute thawh that avangin LADC mai ni lo, ram hmel a mawi a ni, a ti. Council chu mi tam tak beiseina nena lo kalna tur a ni a, chu an beiseina chu tithlawn lova kan chhuah tirna tur hmun a ni, a ti bawk.
LADC a Sr. Asst. Engineer Pu C. Malsawmkima report-a tarlan a nih danin, LADC Finance & Accounts department building hi kum 2018 ah sak tan niin, February 2023 khan sak zawh a ni a, a sak nan hian cheng nuai 167.44 sen a ni.
Post a Comment