May 24, 2023 (Rauthla) : India ram rorelna in Parliament Building sak thar chu May 28, 2023 hian hawn a ni dawn.
Parliamentary Affairs Minister Pralhad Joshi chuan Parliament Building thar hawnnaa tel tur hian political party zawng zawngte sawm an nih thu a sawi a. Vawiina New Delhi-a media mite a kawmnaah Joshi chuan opposition party thenkhat ten he huna tel an tum loh thu an sawi chu pawi a tih thu sawiin, "hei hi kan ram chanchina thil pawimawh tak mai a ni a, politic lam ngaihtuahna chi a ni lo" a ti.
India Parliament building thar hi Central Vista Redevelopment Project hnuaia sak a ni a, tuna Parliament building bul lawka sak a ni. He building hi CPWD enkawlna hnuaiah Tata Projects Ltd ten ₹862 crores sengin an sa a. Building design tute hi HCP Design Planning and Management Pvt Ltd te an ni. December 10, 2020 khan Prime Minister of India Narendra Modi chuan a sak tanna lung a phum a. May 20, 2023 khan sak zawh a ni.
Building tharah hian Lok Sabha member 888 leh Rajya Sabha member 384 te len theihna chamber hrang ve ve a awm a, Lok Sabha chamber-ah hian joint session neih a nihin member 1,272 an leng ang. Tuna parliament building hmanlai ang lovin building tharah hian central hall a awm dawn lova. He building thar chhawng liah hian Lok Sabha leh Rajya Sabha chamber bakah Minister office leh committee room te a awm thung ang.
He building hi kum 150 thleng daih tura ruahman niin, lirnghing lakah pawh him tura duan a ni.
Post a Comment