Lawngtlai, March 22, 2023 : World Water Day-2023 pualin tukin zingkar khan PHED Lawngtlai WATSAN Division Office tualah hun hman a ni a. He hun hi Pu David Zothantluanga, Bawrhsap leh Chairman, District Water & Sanitation Committe, Lawngtlai ni bawk chuan khuallian niin a hmanpui.
Khuallian Pu David Lalthantluanga IAS, Deputy Commissioner leh Chairman, District Water & Sanitation Committe, Lawngtlai chuan khawvel thang chho mek zelah Tui harsatna laka danglamna thlen turin mimal tinte leh sorkar thawhhona a pawimawh thu sawiin, United Nations pawhin khawvel pum huapa Tui leh thianghlimna kawnga hmasawnna chu a ngaih pawimawh thu a sawi bawk.
Khuallian chuan, khawvel hmasawnna kal mekah Bawlhhlawh leh hnawmte paih kawngah mipuite fimkhur tura chahin, kan bawlhhlawh paih dan leh paihna hmun azirin tuihna leh tui thianghlim kan neihna kawngah nasa takin kawngro a su a ni a ti a. Kumin World Water Day pual hian Danglamna ka ni thei tih chu mimal tin ten a taka thlentirtu nih tum tura chah in, keimahni atanga tih tur awmte kan tih tan phawt a tul a. Faina leh thianghlimna kawnga kan khawtlangin hma a sawnna turah Sorkar kuta dah mailoin mahni atanga tan chu thil pawimawh hmasa ber a ni a ti a. Kumin World Water Day thupui hi hawn theuh tur leh a taka ti puitlingtu nih tum theuh turin kalkhawmte chu a chah a ni.
World Water Day vawi-30 na puala hun hmanna hi Er. Netralal Jaisi, EE PHED Lawngtlai WATSAN Division chuan kaihhruaiin, World Water Day hman chhoh a nih dan leh tui chungchanga mipuite tanrualna a pawimawh thu sawiin, tui humhalh kawngah mipa leh hmeichhe tih tur bik a awmloh thu leh mimal tin ten mawhphurhna ah ngaia hmala theuh turin a sawm a. Tuihna chereu mek zelah Sorkar thuneitu ten Dan mumal tak buatsaih a hun tawh a ni tiin, kalkhawmte lawmna thu a sawi bawk. He hun hi Er. L Sangromuana SDO Lawngtlai chuan lawmthu sawinain a khar a ni.
World Water Day-2023 pual hian Rally neih niin, Bawrhsap-in Rally hi a vailiam a, PHED Office kawt atangin Areopaqy, Bazar veng thleng kawngzawh a ni a. Rally-a telte hian Banner leh pamphlets te kengin Tuihna humhalh leh renchem kawnga hmala turin aurualna an nei bawk a ni.
Lawngtlaia World Water Day puala hun hmannaah hian Village Council, New Vengpui aiawhte, YLA New Vengpui Branch te, LWA leh MHIP aiawhte leh thuthar thehdarhtute leh sawm bikte an tel a ni.
Kum 1992 khan United Nations General Assembly chuan tui duh khawp leh thianghlim a awm zel theih nan tui awmsa te awmze nei taka hman a tul zia leh chumi kawnga mi zawng zawng kan thawhho theih na turin March ni 22 hi World Water Day ah a puang a, ti chuan Kum 1993 atang khan World Water Day hi thupui thlan bik hmangin khawvel pumah kum tinin hman a lo ni ta thin a, kumin hi World Water Day vawi-30 hmanna a ni a. Kum in World Water Day thupui atan - 'Accelerating Change- danglamna thlentu i ni thei' tih thlan a ni a, hei hian a tinzawn ber chu tui leh in vawn thianghlim kawnga chak zawka hmasawn a ni.
Post a Comment