Chairman Pu David Lalthantluanga chuan tui chu mihringte'n nun khawchhuahna leh ni tin khawsak rel nana kan mamawh a nih avangin a hman danah fimkhur leh renchem a ṭul tih a sawi a. Lawngtlai District-a infrastructure chungchangah harsatna tam tak a awm chunga Department te'n theih tawp an chhuahna azara hma sawnna thar hmuh tur a awm zel chu lawmawm a tih thu sawiin, Jal Jeevan Mission (JJM) leh Swachh Bharat Mission-Grameen (SBM-G) hnuaia hma laknaah pawh PHED Lawngtlai WATSAN Division te hna thawh chu lawmawm a tih thu a sawi.
He hunah hian PHED Lawngtlai WATSAN Division-a Sr Executive Engineer Er Netralal Jaisi chuan PowerPoint presentation hmangin DWSM hnuaia hma lakna hna thawh kal mek report a pe a. PHED Lawngtlai Sub-Divisional Officer Er L. Sangromuana leh Chawngte Sub-Divisional Officer Er Lalnunfela te chuan an sub-division huam chhunga JJM leh scheme dang hnuaia hna thawh tawh chin leh hmabak ruahmante an sawifiah a. SBM Coordinator Pu Benjamin Lalrinzuala'n SBM-G hnuaia hna kal mek report a pe a. He'ng hma lakna hrang hrang chungchangah hian sawi hona hun hman chhunzawm a ni.
Jal Jeevan Mission (JJM) hnuaia kum 2024 hma ngeia thingtlang in tina tui connection (Functional Household Tap Connection) pek kim turah kum 2019-20 aṭang khan Lawngtlai WATSAN Division huam chhungah hma lak ṭan a ni a. Lawngtlai WATSAN Division hnuaia khaw 158-a chhungkaw 23,314 hnena FHTC pek turah in 14,134 chu pek fel tawh a ni a; hei hi 61% niin, hmabak in 9,180 a la awm a ni.
He hunah hian NABARD hnuaia RIDF aṭanga ₹ vaibelchhe 9 hmanga sak, mi 25,196 chawm thei tur Chawngte Rural Drinking Water Supply Scheme (Pumping) hna thawh mek chu 40% zawh a nih tawh thu report a ni a. Special Central Assistance to States for Capital Investment (SASCI) aṭanga 3rd IR Battalion Thingkah leh Thingkah khaw chhung tana tui pekna tur (Water Supply) siam hna pawh chak taka thawh mek a nih thu leh 85% zawh a nih tawh thu report a ni a. Lawngtlai khawpui chawmtu tui lakna, Greater Lawngtlai Water Supply Scheme tihchangtlunna tur DPR chu Urban Ministry-ah theh luh leh pawm a nih tawh thu ngaihthlak niin, hemi hnuaiah hian Lawngtlai khawpui chhunga tui sem darhna tur te, Chhimtuipuia standby submersible pump dahna tur te, treatment plant tihchangtlunna tur leh Ṭawngṭai tlanga litre nuai 1.5 dawng zonal tanky siamna tur te a tel dawn a ni.
He hunah hian JJM kalpui chungchanga PHED lamin harsatna an tawh an tar lan zingah duh anga pipe hman tur a lo thlen chak loh ṭhin avanga hna thawh a khaihlak ṭhin thu te, kawng chhiat vanga duh anga pipe leh hmanraw mamawh phurh luh a chak theih loh dan te, chhung tinin 5% sum emaw, tha emaw an thawh ve tur chungchangah khaw ṭhenkhata harsatna tawh a nih thu te, khawl leh tuizem bunna hmun tur duh anga ram ṭha hmuh a harsat thu leh zangnadawmna phut avanga hna ṭhenkhat a khaihlak ṭhin thu te a tel a ni.
Post a Comment