Aizawl, 6th March, 2023:_ March ni 5, 2023 (Pathianni) tlai a Mizoram ramri venghim tura police duty te inkara tualthahna thleng chu ZPM chuan kan demin pawi kan ti hle a, tualthattu Havildar Bimol Kanti Chakma hi kan dem tak zet a ni.
ZPM chuan ramri venghim tura Police duty Hav. J. Lalrohlua leh Havildar Indra Kumar Rai-te chu an thawhpui Hav. Bimal Kanti Chakma-in an duty-na hmuna a kaphlum chu hriatthiam har a tiin, pawi a ti takzet a. Kan ramri venghim tura kan dah te hnen atanga hetiang thu lungchhiatthlak leh thinthawng tak Zoram mipuiin kan hre ta mai hi pawi kan ti takzet a. Chhiattawk chhungte kan tawrhpui takzet a ni.
ZPM chuan ramri hi ngaipawimawhin, vawi engemawzat kan sipaite duty-na hmunah kalin kan lo tlawh tawh thin a, harsatna an neih hrang hrangte kan hriatpuiin, hengte hi vawi duai lo kan lo auchhuahpui tawh a, tuntum thilthleng hian ramri duty te ngaihsak an tulzia hre thar leh turin MNF sawrkar hi kan chah a. Tun hnuah hetiang thil a thlen tawh lohna turin sawrkar hian ramri vengtute ngaihsak lehzual turin kan ngen nghal bawk a ni.
Tun hnaiah Mizoram hmun hrang hrangah – Tualthah, ruang chhar, rukruk, pawngsual leh mipui nunphung ti ralkhel thei thu hrang hrang hriat tur a awm chho ta zut ta mai leh ruihhlo hluar ta lutuk te hian dan leh thupek kenkawh kawnga sawrkar hlawhchhamzia a tarlang chiang hle-ah ZPM chuan a ngai bawk a ni.
Post a Comment