March 21, 2023 (Rauthla) : Mizo Zirlai Pawl (MZP) chuan Mizoram a eirukna dona tura din Mizoram Lokayukta chuan, tun dinhmunah beisei a phak lo nasa hle tih sawiin, Danin a sawi angin an case dawnte chhuitu tur Enquiry Wing an neih loh avangin harsatna lian tak an tawk mek tih an sawi a.  Loh theih lohna avangin Mizoram sawrkar Agency ACB an hman avangin duh angin an hnu chhuina kawngah an chak lo niin MZP chuan a hria tih sawiin, A rang thei ang bera Enquiry Wing din turin sawrkar an ngen tih an sawi.  

Vawiin khan MZP chuan Pu Andrew F. Lalramnghaka, Vice President hoin Mizoram Lokayukta Chairman Pu C. Lalsawta, IAS (Retd.) a office-ah a hmu a. Mizoram a eirukna dona tura din Mizoram Lokayukta dinhmun leh a kalhmang a enfiah a. An harsatna hrang hrangte an sawipui. 

MZP sawi danin, Lokayukta-ah hian thawktu indaih lohna a nasa hle a, Act-in thawktu mi 93 awm tura a tih laiin tunah hian thawktu mi 42 chiah an awm mek a. Thawktu indaih lohna hi mi 49 lai a ni a. Tuna Mizoram Lokayukta a thawktu tam ber pawh department dang a mi deputation a pawh chawp leh Contract basis deuh vek an ni a. Thawktu thenkhat phei chuan hna tha zawk hmuh avangin an bansan fo bawk a. Tuna Lokayukta awmdanah hian Eirukna do tak tak tura beisei chi niin a lang lova, ngaihsak an tul takzet niin an sawi.

MZP chuan tunah hian Mizoram sawrkarin Lokayukta dan siamṭhat a tum mek niin hriat a ni tih sawiin, he dan hi siamṭhat a nih pawhin a nih tur ang a kalpui hi MZP chuan a duh takzet a. Mite ber atanga Chief Minister thlenga chhui thei tur leh, eirukna a inhnamhnawh tu pawh hremna pe thei tur a thuam chak hi MZP chuan a phut tlat a ni, an ti. 

MZP chuan Mizoram a eirukna leh lemhletna dona atan Mizoram-ah Lokayukta hman a nih theih nan kum 2012 aṭang khan hma a la tan a. Kum 2014-a Mizoram Lokayukta Bill Mizoram Legislative Assembly-in a passed pawh khan beiseina sang tak nen a thlir a. Kum 2019 aṭanga function anih aṭangin beisei a phak tawk lohna awmte pawh siamṭha turin MZP chuan Mizoram sawrkar a ngen takzet a, a tul angin MZP chuan a enzuiin hma a la zel dawn a ni, an ti.

Post a Comment

Powered by Blogger.