Lunglei the 2nd March, 2023 : Vawiin khan State Election Commission kaihhruaiin State Election Commissioner Pu Laima Chozah, IAS (Rtd) hovin Lunglei DC Conference Hall-ah kumina Lunglei Municipal Council (LMC) inthlanna hmasa ber neih tur atan Ram Danpui in hmeichhia te tana ram leh tualchhung inrelbawlnaah seat awm atanga za zelah 33 a zuahsak (reserved) thlanna (draw of lots) neih a ni.
Hmeichhia te tana LMC a Seat 4 hauh te hi Lunglei khawpui chhunga Assembly Constituency pali - Lunglei North (30), Lunglei East (31), Lunglei West (32), Lunglei South (33) -te atangin pakhat theuh pawh niin chung Female Reserved Ward pawh te chu – Ward II (Serkawn, Zohnuai), Ward VIII (Ramthar, Farm Veng), Ward V (Sazaikawn, Hauruang, Rahsiveng) leh Ward X ( Sethlun, Luangmual, Theiriat, Hrangchalkawn) te an ni. Draw of Lots ah hian MHIP, YMA, MUP leh MJA aiawhten an pawt a ni.
Draw of Lots for Female Reserved Wards ah hian Lunglei DC & DEO Pi Ramdinliani, Lunglei SP Pu Rahul Alwal, SEC Deputy Secretary Pu R. Vanrengpuia leh official dangte bakah media mi te, Political party-te, NGO hrang hrang aiawh ni thahnem tak an tel a ni.
Pu Laima Chozah, IAS (Retd.), State Election Commissioner, Mizoram in he hunah hian thu sawiin Ram Danpui leh Mizoram Municipalities Act 2007 hnuaia ram leh tualchhung inrelbawlnaa hmeichhia ten chanvo zau zawk an neih theih nana an tana seat hauhsak reserved dan tlangpui a sawi a. SEC chu Ram Danpui hnuaia din Constitutional Body anih angin hmalakna leh ruahmanna reng reng mipui hriat tur chu felfai leh langtlang taka an tih thin thu sawiin vawiina Hmeichhia te tana Seat Reserved tur thlanna pawh langtlang taka kalpui anih thu a sawi a. LMC inthlan neih tur chu felfai taka kalpui anih theihnan kalkhawmte chu an hma zawna an tih tur theuh tha taka hlen chhuak tura chahin Mizoram Municipalities Act, 2007 lo zirchianga an mawhphurna leh chanvo neih te bel taka lo hre theuh turin a chah a ni.
Kumina LMC Inthlanna atana Hmeichhia te chauhin an chuh theih tur Municipal Ward 4 te chu:
1. Ward II - Serkawn, Zohnuai (30 Lunglei North Assembly Constituency)
2. Ward VIII - Ramthar, Farm Veng (31 Lunglei East Assembly Constituency)
3. Ward V - Sazaikawn, Hauruang, Rahsiveng (32 Lunglei West Assembly Constituency)
4. Ward X - Sethlun, Luangmual, Theiriat, Hrangchalkawn (33 Lunglei South Assembly Constituency)
Post a Comment