Lawngtlai, March 22, 2023 : Vawiin khan Lawngtlai District Consultative Committee (DCC), District Level Review Committee (DLRC) leh District Level Security Committee (DLSC) chu an Chairman, Lawngtlai Bawrhsap Pu David Lalthantluanga hovin DC Conference Hall-ah an thu khawm.

He thut khawmah hian Lead Bank Office-a Lead District Manager (Siaha & Lawngtlai) Pu Lawmkima leh NABARD Lungleia District Development Manager Pu Evan T. Munsong te bakah, bank hrang hrang leh line department ai awhte an tel a ni.

He hunah hian kum 2022 October thla atanga December thla (3rd Quarter, 2022-23) chhunga Lawngtlai District-a bank hrang hrangte hna thawh thlir let niin, hmachhawp an neih leh hma lak zui dan tur te sawi ho a ni a. Bank leh mipui sum vawn himna (security) lam te, pawisa leng vel (currency management & remittance) chungchang te, khua leh tuite hamthat nana sawrkar laipui ruahmanna hrang hrang - PMAY (Housing for All), Women Self Help Group, loan chi hrang hrang - Kisan Credit Card, KCC (AHDF special campaign), Prime Minister's Employment Generation Programme (PMEGP), Medium Industries loan, Education loan, etc. leh social security scheme hrang hrang - Pradhan Mantri Jeevan Jyoti Bima Yojana (PMJJBY), Pradhan Mantri Suraksha Bima Yojana (PMSBY), Atal Pension Yojana (APY), etc. lama bank hma lak dan te sawi ho a ni bawk.

He thut khawmah hian Financial Inclusion leh Financial Literacy chungchanga hma lakna special review kalpui nghal a ni a. Mi harsa zawkte leh kut hna thawktute'n loan chi hrang hrang an hriat chian a, an chhawr theih nan inzirtirna zau zawk buatsaih zel ni se, tih niin, agriculture kaihhnawih loan pek chhuah a tam zawk theih nan line department leh bank lam te'n tan la chho zel se, tih a ni bawk.

He hunah hian Lawngtlai District chhunga bank hrang hrangte'n kum 2023-24 chhunga loan an pek chhuah tur zat target tukna, 'Annual Credit Plan 2023-24' pawh tlangzarh nghal a ni.

Post a Comment

Powered by Blogger.