Aizawl March 13,2023 : Vawiin 13th March, 2023 (Monday) hian BJP Mizoram Pradesh chuan BJP State Office, Mipui Rûn ah Karthar inhlanna leh Political Session nein, Pu R. Vanramchhuanga State Vice President-in inkhawm kaihruaiin Pu Laldawngliana, State Executive Member-in Pathian hnena inhlanna hun a hmang a ni.

    Inkhawm ah hian Party mi, Party tana feh chhuak te aṭangin report ngaihthlak niin, Pu R Vanramchhuanga'n New Education Policy chungchang sawina hun a neih hnu ah Pu Vanlalhmuaka, State President-in thusawina hun a nei a ni.

    Pu Vanlalhmuaka chuan, "BJP Sorkar hi keini ai mah hian Party dangte hian an nghakhlel zawk niin a lang, a chhan chu Campaign-a kan chhuahna ah Party dang hian Mizoram Politics hi an lo chik êm êm mai a, BJP tello Sorkar-na in awm zia a neih loh zia an hriat avangin Party danga hruaitu lawk leh thil hrechiang deuh te chuan BJP Sorkar-na thlentir hi an tum hle niin a lang a ni," a ti.

    Pu Hmuaka chuan, "Mizoram hi Pathian-in min hmangaih êm avangin, Mizorama cheng mipui te tana Rawngbawlsaktu ni turin Pathian-in min thlang a ni. Party dang te erawh chuan mipui nilovin, mi tlem te te tan rawng an bawl ṭhin a, chumi rah chhuah chu Mizoram pum retheihna a hruai a ni. Mi tlemte te hnenah sum a lut a, inkhuangrual lo takin vawiin ah chuan Mizoram mipui dinhmun a awm phah ta a ni. BJP din chhan hi Mizoram mipui te hian hre nawn leh ila, India ram State dang te hmasawn ruala Mizoram pawh mahni ke a din tir hi kan tum ber a ni," a ti.

    Pu Hmuaka chuan sawi chhunzawmmin, "Mizoram hian kan bial hmangaihtu MLA kan nei tawh em? tih pawh hi zawhna lian tak a ni. Mizoram a MLA Term khat lek ni te pawh hi, Term khat chhung an MLA ringawt pawh hian, Vawkte chaw ei tha ang mai, an mawm hmaih zel a, an bial ah erawh Miretheite dinhmun chu Kum 5 chhungin a ngai reng ṭhin. Chuvangin Mizoram a MLA kan neih tawh te hi Mizoram mipui te hian chhut chiang ila, Mipui rawngbawl nge an nih an mahni leh duhsak zawngte te tan chauha thawk an nih? tih hi ngaihtuah chian a hun tawh a ni. Keini BJP Manifesto pui ber erawh chu, Central hruaitu ten min chah fo angin, Pathian tih chungin, Mitin an mamawh thlen sak a, an chanvo, chan tur, an chan ngei theih nana hmalak hi a nih avangin, Mizorama Party kan hmuh tawh te nen chuan kan danglam a. Kan Bible in "a ram leh a felna zawng hmasa ula, tichuan heng zawng zawng hi a pek belhchhah ang che u", a tih angin, Pathian tihna nen Ram kan hruai loh chuan Mizoram hian hruaitu kawng bo kan zui kan zui mai dawn a ni. Chuvangin Kum 2023 MLA General Election lo awm turah hian Mipui hnen thleng phâk Development kengtu BJP kan VOTE ngei a rinawm ta a ni," a ti bawk.

Post a Comment

Powered by Blogger.