Zanin zanlaiah Manchester City chuan RB Leipzig an tlawh dawn. Champions League round of 16 1st leg-ah hian Manchester City chuan an player pawimawh pahnih an hruai thei lo.
Kevin de Bruyne leh Aymeric Laporte te chuan RB Leipzig hi an hmachhawn thei ve dawn lo a, Guardiola chuan anni pahnih hi an dam lo niin pre match press conference-ah a sawi.
Anni pahnih hi inrinni zana Nottingham Forest an hmachhawn tum khan an inlan a, RB Leipzig hmachhawn thei dawn lo mah se, Premier League match hmasa berah an khelh leh theih a beiseiawm.
Bernardo Silva chu left back-ah a khelh leh ngei hmel a, Zinchenko an chhuahtir hnu hian Guardiola chuan, Portuguese midfielder hi an mamawhna hmun apiangah a chhawr a ni ber mai.
"Full back-a Bernardo ka chhawr hi a atthlak miah lo a nia aw. Mi te chuan ani left back-a a khelh avangin goal kan chhuah niin a ngai thin.
"Nottingham Forest kan hmachhawn tum khan Bernardo hi khel lo selang chuan, goal khat aia tam chhuah thei kan ni. Ani avang hian game kan thunun theih phah thin a ni," tiin Manchester City boss Pep Guardiola chuan a sawi.
Arsenal an hneh tum pawh khan Bernardo Silva hi left-back-ah a khel a, Bukayo Saka nen an inhmachhawn a nih kha.
Silva khan Saka kha hmachhawn harsa chu a ti ve hle, mahse Ake nen an inthlawp tha a, buaina nasa tak an tawk lo, hnehna an chang ta bawk a. Silva hi khawi hmunah pawh a khel thei niin a lang.
Post a Comment