Aizawl, the 23rd February, 2023: Vawiin khan sawrkar laipui Ministry of Commerce and Industry hnuaia Rubber Board hotute chuan Chief Secretary Dr Renu Sharma chu a office ah hmuin Mizoram leh hmarchhak state a an hmalaknate an sawipui.

Rubber Board te hian Mizoramah kum 2021 khan office hawng tanin Soil Department hnuaiah hma an la a. Mizoramah hian District hrang hrangah hectare 1500 a zauah hma an la mek a, beneficiary 1200 an nei. Kumin hian hectare 1600 a zauah hma lak tumin an inbuatsaih a ni.

Chief Secretary chuan Mizoramah thelret hmun siam leh tharchhuah hi loneituten kan la hmelhriat lutuk loh avang leh mi tam tak tan chuan thil thar a nih avangin inhrialhriatna leh inzirtirna neih tul a tih thu a sawi a. Rubber hian puitling turin kum engemawzat a duh avangin thlai leh thei dangte nen a chin pawlh dan ngaihtuah chu thil finthlak nia a ngaih thu a sawi.

Mamit District a Kanhmun, Hortoki leh hmun thenkhatah te loneitu tlema zawngin kum 2009 atang khan thelret hi an phun tan tawh a. Farmer thenkhat chuan a hlawkna te pawh an tel tawh a ni. Rubber Board ten hma an lak mekna te hi hmun kilkhawr leh lirtheiin a tlawh pawh lo ram te a nih avangin inkalpawhna kawng mamawh a nih thu te sawiho a ni.

Rubber Board Executive Director Dr.K.N.Raghavan IRS chuan Rubber Board official te hi a kaihhruai a ni

Post a Comment

Powered by Blogger.