Pu TC.Pachhunga chuan, MNF sorkar chu rem leh rem loin min beih an tum a, Uniform Civil Code chungchangah pawh Opposition-ten kan sorkar tihhmingchhiat an tum mek a, amaherawhchu, tun Session-ah hian Home Minister, Pu Lalchamliana chuan kan duh lohzia lantirna house-ah a pulut dawn a ni, a ti. Kan MP te pahnih pawhin theihtawp an chhuah a, Union Minister in 21st Law Commission of India chu zirchiang turin a ti a, amaherawhchu, an term a lo tawp tawh avangin, 22nd Law Commission la din loh anih avangin kan MP-te zawhna hi an chhang thei lova mahse, an pass dawn lo niin an sawi bawk a ni, a ti.
Pu Tca chuan Sport & Youth Services Dept. chungchang sawiin, Sport Minister Pu Robert-a’n a hna atlinin angaihna a hria a, tun tuma kan budget cheng vaibelchhe 6.4 bawr vel chuah ani a, chuti chung chuan a theih dan danin tan la a, hmasawnna hna tam tak a thawk tawh a, ICT lamah nise lockdown chhung zawnga school naupangten anmahni in atanga lehkha an zir a, an exam thei bawk a ni, a ti.
Tourism lamah pawh hma nasa takin kan sawn a, hrileng avangin mikhual kan thleng tha lova, amaherawhchu infrastructure lamah hma kan sawn nasa em em a, hmanni a Tourism Mart kan neihte khan hma nasa takin min sawn tir a. Tourism Minister zarah sum tam tak kan hailut a, sport leh tourism atang a kan sum hmuh hian kan finance a tipung awk zel a, tourism atan cheng vaibelchhe 1000 leh Sport atan cheng vaibelchhe 1250 sport atan ADB chuan External Aided Project atangin min rawn pek an tum a, tunah hian NITI Aayog-ah ala awm mek a, reiloteah min rawn pe chhuak thuaiin ka ring a, hetiang ang project lian hi sport dept.ah hian Mizoramah hian a la awm ngailo a ni, a ti. Tunah hian Artificial Grass hi mual 30 phah belh kan tum a, hawn mai theih pawh a awm tawh a, sport-ah hian hmasawnna hi thlir tham a awm a ni, ati a, Pu Tca chuan, thenkhatin sport ah chauh hmasawnna a awm an ti thin, heng pawisate hi hmun dangah hmang rawh se, te an ti thin, amaherawhchu, sport atang a pawisa lo kal hi hmundang leh thildang atan a hman ve theih a nilo, tih kan hriat angai a ni, a ti.
Pu Tc Pachunga chuan, Political-a ngelnghehna nei lemlo inhmukhawm hi ZPM-ah an inbawr khawm a, MNF te min bei char char a, sorkar tur chuan MLA 21 an neih a ngai a, chumi nei tur chuan MDC pawh chuh ngamlo tan chuan neih ngaihna a awmlo a ni, a ti a. Lunglei undivided bial sarih(7) ah hian ZPM tan beisei tur avang khawp mai, kum 2018-ah khan Mamit district-ah ZPM candidate-ten an dahkham an chawi vek a ni, a ti.
Hmanah chuan mi nemna lai zawngin party kan nilo, kohhran hi kan unit a ni, an ti a, tunah chuan party-ah an inlet fel der tawh a, District hrang hrangah hian ZPM hian chakna tur tha hrui an nei lo, an leader ber hi din na tur bial dapin a zinkual reng mai a ni, Pu Tc Pachhunga chuan a ti bawk.
Congress lam pawh an kungpui a ro tawh avangin helamah chuan par an chhuang thei tawh lo a, candidate tur pawh tlawmngai tur an zawng khawm mek a, Pu Hawla a awm tawh lo a, March thla sunhlu ang mai an ni tawh a, chem hnunglamin han khawng ila an til er er mai a ni, a ti.
Sport & Youth Development Board Vice Chairman chuan, inkalpawhna chungchang sawiin khawchhak leh khawthlang lamah han kal ila, awlsam leh hnai takin kan thleng zung zung thei tawh a, kan sawrkar hnathawh hi a ropui em em a, MNF hi awm lo ta sela, Mizoram hi entinnge awm ang? tih hi ngaihtuah tham a ni, a ti.
Hnam Run chhung inkhawm hi Pu Liantluanga Adviser in kaihruaiin, Pu Malsawma MNF Senior Front President chuan hunserh a hmang a, party mi thahnem tak an kal a ni.
Post a Comment