February 11, 2023 (Inrinni)) khan PC. Lalmuanawma s/o PC. Ralzama, Republic Vengthlang Aizawl, Lalbiakdika s/o Lalthlamuana, Saron Veng Aizawl, Robert Lalthlamuana s/o Lalmalsawma, Durtlang leh Lalramkima s/o Siamthanga Saron Veng, Aizawl nia insawite chuan Phawngpui National Park hi tlawhin, Far Pak vel ni ngeia hriatah Silai hmetpuakin, National Park a dan lova an chetna Video chu thehdarh a ni a, Pu Rinmuana, Deputy Conservator of Forest, Chhimtuipui Wildlife Division leh a department thawktuten chhuizuiin, Sangau Police puihna an dil a, heng mite hi an riahna hmun Sangau Tourist Lodge-ah February 12, 2023 zing khan an hmanruate nen an man.
Sangau Forest RO Pu B. Vanlalnghaka hnen atanga Rauthla thu dawn danin, Sangau Police puihnain Phawngpui National Park-a dan lova silai hmet puak mi pali an man te hi February 12, 2023 khan Forest Department chuan Sangau Police te nen Lawngtlaiah an chhuk thlak pui a, Lawngtlaiah Forest Custody-ah awmin, Lawngtlai Magistrate hmaah hruai niin, vawiin khan District Jail, Lawngtlai-ah dah luh an ni.
Dan lova che puh mi pali te chuan, "Mizorama tlang sang ber Phawngpui tlangah hian kal ve kan chak a, kal lamah duty-in ban pharin min ko niin an sawi a. Mahse, hei hi kan hmu lo. Haw lamah motor ken luh man Rs. 200 chu duty hnenah kan pe. Mizorama tlang sang ber kan kal takah chuan nuam kan ti a, silai kan hmet puak a, ramsa leh thildang tihnat kan tum lo" an ti.
Sangau RO chuan, Wildlife Protection Act-in a sawi angin, ramsa tihnat tum lo mahsela, National Park chhungah chuan ramsa tihnat theihna hmanrua hrim hrim ken luh theih a ni lo tih a sawi a, heng mi pali te hian National Park chhunga kal theihna permit an la lo tih a sawi bawk.
Pu Rinmuana, Deputy Conservator of Forest, Chhimtuipui Wildlife Division chuan Phawngpui National Park-a dan lova che te hi Wildlife Protection Act Section 9, 27, (4), 31, 35 (8), 51 hmanga man leh hrem an ni tih a sawi.
Post a Comment