Lawngtlai 18.February,2023 : Vawiin khan Lawngtlai Bawrhsap Pu David Lalthantluanga chuan, Lawngtlai khawpui atanga hmar lam Lawngtlai District chhunga National highway kawngpui zauh hna thawh mek chu a hmunah kalin a enfiah a. Hna enkawltu leh hna thawktute nen harsatna hrang hrang leh hma lak zui zel dan tur an sawi ho.
Lawngtlai Bawrhsap chuan kawngpui zauh mek vanga kawng khuin AOC Veng leh Thingkah inkara lirtheia veivakte leh khaw chhung mite tan harsatna a thlen thin tih report an dawn thu sawiin, hna thawktute chu mipui harsatna sut kian a nih theih nana a theih ang anga hma la tur leh khawpui chhung (Thingkah leh AOC inkar) bik chu ngaih pawimawh hmasaka nei turin a hriattir a. Hna thawktute chuan kawng zauhna tur huam chhunga ram neitu thenkhatin lungawi lohna (complaint) an neih avanga hna thawh theih lohna lai a awm thu sawiin, mipuiin an thawhpui that chuan thla 1 chhungin GSB phah zawh a nih tur thu leh kawng khu pawh a ziaawm tur thu an sawi a ni.
Hna thawktute chuan kawngpui zauhna tura ram lak tawh chin kawngpui kama chenna in awm, in neitute'n an la chhuahsan loh avang leh an la thiah loh avanga hma lak theih lohna eng emaw zat a awm thu an sawi a. Hemi harsatna su kiang tur hian Bawrhsap chuan official-te, contractor-te, village council te leh ram neitute nen Joint verification nei a, a mal te tea an dinhmun a hmuna enfiah a, mipui harsatna siam lo zawng leh chak zawka hna kalpui a nih theih nan hma lak ni se, a ti a. Kawngpui kama ram neitute chu ram tana rawngbawlna rilru pu a, harsatna siam lo zawnga hma la tur leh kawng laih hna thawktute tha taka thawhpui tura ngenin, National Highway kawngpui zauh mek chu chhim lam tana kawngpui pawimawh tak a nih angin hna thawh dan tur hun bi tuk sa leh a hmelhmang ruahman sa mila a tha thei ang ber leh a chak thei ang bera hna thawk turin contractor-te chu a chah bawk.
National Highway-54 kawngpui zauh hna thawh mek hi package riatah then niin, Lunglei District chhung Tawipui 'N'-II atanga Lawngtlai College Venga 71 RCC thleng hi Package-6 a ni a. NHIDCL enkawlna hnuaiah ABCI te'n he hna hi an thawk a. NH-54 zauh hna Package-6 hi June 2023-ah zawh tura ruahman a ni.
Post a Comment