Lawngtlai, February 25, 2023 : Lai Hnam Kut ngaihhlut ber Hlukhla Puai (Hlukhla Kut) chu nimin khan Central YLA Hall ah ropui taka hman ani a. Pu V.Zirsanga, CEM LADC chu Kut Pa niin, Pu BN Thangpuia EM Art & Culture Dept. enkawltu chu kut thlengtu a ni.
Kut Pa Pu V. Zirsanga CEM LADC chuan, Hnam hrang hrangin ziarang leh tihdan phung kan nei vek a, chung Hnam hrang hrang te chuan an Culture vawnhim a, roh na chang an hriat loh chuan hnam boral mek an ni thin. Keini Lai fate pawhin Hlukhla Puai hi kan ngaihhlut loh chuan kan hnam hi a boral mek tihna ani ang a ti a. Ram leh hnam a dinchhuahna tur ah, Ruihhlo leh sualna chi hrang hrang ten min chiahpiah zel anih chuan, he Lai Hnam hian dinchhuah Ni a nei ngai dawn lo, chuvangin, Hnam tan ding ngam ila, kan Hnam ziarang leh Culture te khawiah mah zahpui lovin, kan pho chhuah theihna hmun apiangah i pho chhuak zel ang u ati bawk.
Kut thlengtu Pu BN.Thangpuia, chuan Covid hrileng in min tihbuai avanga kum 2 kan hman theih loh hnu ah, Hlukhla Puai chu a vawi-5 na atan kan hmang leh thei chu lawmawm atih thu sawiin, Kut hmangtu zawng zawngte chibai bukin, duhsakna a hlan bawk.
He huna Khual zahawm Pu VL.Hmuaka, Chairman.LADC pawhin thu tawi sawiin, Hnam a dinchhuahna tur a pawimawh tak Hnam tawng kan uar zel a pawimawh thu sawiin, mahni hnam tawng zahpui kan awm anih chuan kan hnam chu a boral mek tih sawiin, Lai Tawng chu hmang uar zel turin kalkhawmte a chah bawk.
Hlukhla Kut ah hian Hnam lam a intihsiakna buatsaih niin, Council Veng Branch YLA chu pakhatna an ni a, Lai Cultural Club.College veng chu Pahnihna an ni bawk. Kumdanga an tih thin angin, Miss Hlukhla thlanna neih leh ani a, Kum 2023 Hlukhla Miss atana thlanchhuah chu Nancy Vanlalchhanchhuah, Lawngtlai New Vengpui niin, 1st Runner up chu Angeline Vanlalanpuii, Chandmary Veng ani a. 2nd Runner Up ah Sarah Lalrinngheti Council Veng an thlang bawk.
Hlukhla Puai 2023 ah hian Zaithiam hrang hrang ten zaiin mipui an awi a, Lai Upa Pawl ten Hlado chhamin hun an hawng a. Pu Chalnghingluaia, Art & Culture Officer.LADC chuan lawmthu sawiin hun a khar ani.
Post a Comment