Pu Zoramthanga chuan sorkar kum thara sum hmuhna tur, Revenue receipt ah Rs. 11,486.63 crores leh Capital receipt ah Rs. 2,723.32 crores a nih thu a sawi a, sum hmanna tur, sorkar inrelbawlna Revenue expenditure ah Rs. 11,068.76 crores niin, hei hi budget pumpui atanga 78.10% a ni a, hmasawnna hnathawhna tur, Capital expenditure ah Rs. 3141.19 crores dah niin, hei hi budget pumpui atanga 21.9% a ni tih a tarlang bawk.
Chief Minister chuan, SEDP atangin Health Care Scheme atan cheng vbc 50 leh Lottery sum thawhchhuah atangin cheng vbc 10, a vaiin cheng vbc 60 dah a ni a, hei hian health care bill ba a phuhru dawn lo a, Asian Development Bank sum cheng vbc sang 1 dil mek chu hmuh a nih chuan mumal zawkain kalpui theih a beisei awm tih a sawi bawk.
CM chuan SEDP Family Oriented Scheme-a sum dah cheng vbc 300 chu chhungkaw sing 6 ten cheng sing 5 theuh an dawn theih nan ruahman a ni a, a thawh khatnaa dawng tawh te bakah a thar engemawzat pek an ni dawn a, a dawng tur zat leh thutlukna pawimawh dang chu thuneitu sangte thutlukna a ni ang a ti a, a thawh khatna ami te pe zo turin sanction issue peihfel vek tawh a ti bawk.
Chief Minister chuan, sorkar sum puk tur zat ruahman chin chu cheng vbc 2689 leh nuai 72 a ni a, sorkar chuan sum puk tur zat a ruahman aia tam a la puk ngai lo a, rampumah Mizoram chu leiba nei tlem ber dawttu a ni tiin, sum puk chungchangah sorkar laipui phalna thlap zela puk a ni thin tih a sawi bawk.
Post a Comment