Aizawl 14.Feb,2023 : Vawiin thutkhawmah hian Home Minister Pu Lalchamliana Official resolution put luh, “India ram puma hman tura Uniform Civil Code, dan siam tumna awm apiang chu he House hian lungrual takin a do zel ang” tih chu member hrang hrangten an sawiho a, resolution pu luttu Pu Lalchamliana chuan, UCC chu India rama hnam hrang hrang leh sakhaw hrang hrangten kawng hrang hranga tihdan phung an neih chu paih bo veka dan pakhat inang tlang hmanga hrut rual vek chu UCC-in a tum nia a lan thu a sawi a, hetih lai hian he dan hi lo siam pawh ni mahsela, India sorkar leh MNF te inremna anga, Article 371 (G) dan hmangin Mizoram sorkar remtihna lo chuan he dan hi Mizoram-ah hman theih a ni lo a, Mizoram tan a hlauhawm lo a ni tih hre mah se, India ram pum thlirin a tha lo nia a lan avangin Mizoram pawna awm Zofate tan a him lo thei a, hei vang hian UCC dona resolution chu pass pui ngei turin member te a ngen a ni.Tuichawng bialtu MLA, Dr. BD Chakma, BJP legislature party aiawh chuan, UCC dan siam chungchanga Mizoram Rajya Sabha MP, Pu K. Vanlalvena'n, Union Law and Justice Minister Kiren Rijiju a zawhna ah, Union minister chuan UCC chu tun dinhmunah Parliament sawiho tur leh Bill pu lut turin hmalakna a awm lo tih chiang taka a chhan tawh thu a sawi a, tuna he dan chungchang lo sawi lawk chu a la hma lutuk niin a sawi a, House leader, Pu Zoramthanga bakah opposition group leader Pu Zodintluanga leh Pu Lalduhoma te chuan UCC dodal tura resolution chu an thlawp tih an sawi a, House chuan Home minister put lut official resolution chu lungrual takin an pass a ni.
Post a Comment