Lawngtlai 13.February,2023 : Zanin (13.02.2023) hian Young Lai Association, Lawngtlai Chandmary te chuan Chandmary Inpui ah Chandmary Khawtlang Motor hlanna hun an hmang.

Pu Neil Lalfakzuala, Branch YLA Vice President in a kaihruaiin, Chandmary khawtlangin chhiatni atana tangkai taka kan hman tur, khawtlang mipui sum tlingkhawm atanga lei anih thu a sawi.

Lawngtlai Chandmary Village Council President, Pi Hmangaihsangi chuan, in lungrualna nen ke kan pen chuan khawtlang hmasawnna atan thil tih theih loh a awm lo, a ni tih kan hriat nawn fo hi a tul a. Khawtlang mipuiin chhiat kan tawhin lirthei kan mamawhna a sang hle a. Chutiang huna tangkai taka kan hman theihna turin khawtlang mipuite kan tangrual hle a, kan sum thawhkhawm atanga kan nei thei hi khawtlang lungrual kan nihna a lang a, hei hi vawng nung chhunzawm zel ila, inpumkhatna leh inlungrualna nen khawtlang hmasawnna turin ke i pen zel ang u, a ti bawk.

Chandmary Branch YLA President Pu Hrilsangzuala chuan, chhiatna thil ah lirthei indaihlohna a nasa hle mai a, damdawi In ah ruang lak tur a lo awm a, chhiat tawk te In a mamawh tur hrang hrang bungraw lak tur a lo awm bawk thin a. Chung zawng zawng ah chuan lirthei a lo ngai thin a, mahse YLA in chutianga lirthei tha leina tur sum kan nei lova. VC te nen Joint Meeting kan nei a, mipui ah dilna thlen mai nise, kan ti bawk a. Chung sum tlingkhawm atang chuan khawtlang in a mamawh em em lirthei hi kan nei thei ta a, khawtlang mipui phal taka sum leh pai thawhtute hnenah pawh lawmthu kan sawi bawk ani, a ti. 

Pu Alex Lalzawmpuia, Finance Secretary in lirthei an lei dan hetiang hian report a pe a. Tuna khawtlang lirthei kan neih tak hi TATA Winger a ni a. TATA ZOTHAN AUTO WORKS, Aizawl delear atangin Rs 14,19,580 sena lak chhuah a ni a. Hemi bakah hian thil tul hrang hrang buaipuina te nen lirthei kan neih theihna tura sum sen zawng zawng chu Rs 16,42,770 a ni.

Chandmary khawtlang motor hawnna hi Chandmary YLA  Branch Sr.Adviser Pu Kapzauva’n hawnna neiin Rev LH.Lalpekhluna’n Pathian hnenah hlanna tawngtai a nei bawk ani

Post a Comment

Powered by Blogger.