February 10, 2023 (Rauthla) : School Education Minister Pu Lalchhandama Ralte chuan academic session thar 2023-2024 atangin Sorkar school-ah uniform inang (common uniform) vek hak a ni dawn tih a sawi.
Vawiin Mizoram Leagislative Assembly session neihah Vanlalhlana, Aizawl North-I bialtu MLA zawhna chhangin Minister chuan school uniform inang neih chu naupangte zingah intluktlanna a awm theih nan te, primary school, middle school, high school leh higher secondary school zirlai te awlsam zawka hriat hran nan te, an discipline vawn that nan te leh awlsam zawk leh man man zawka uniform lak khawm/lei a nih theih nan ruahman a nih thu a sawi a, hmun danga insawn tan uniform hran lei ngai lo tur hi a tha hle bawk a ni, a ti.
Uniform inang neih a lo chuah dan sawiin Minister chuan, SEDP hnuaiah Human Resources Development Board a awm a, he board hian India ram hmun dang kal dan l;eh kan economy dinhmun enin sorkar school kal laite hian uniform inang neih a tha lawm ni tih an rel a. He an rawtna hi sorkarah an thlen a. Sorkara a concern department-in a ngaihtuah lai hian zirtirtu association hrang hrang aiawhte koh tel an ni a, nikum March thla khan rampumah sorkar school-ah uniform inang neih neih tiin kan rel a, inbuatsaihna hun siamin, a hman tan hun atan academic session thar 2023-2024 nise kan ti, tiin a sawi. Minsiter chuan, uniform rawng pawh hi zirtirtu association te thlan a ni a. Official order hi engkim peihfel a nih hnu, June 24, 2022 ah chhuah a ni, tih a sawi bawk.
Hetiang hian an form neih dan tur ruahman a ni.
Primary School - Kekawr tlawn leh pawnfen (A dum pawl), Kamis a ban bul (A var), Pheikhawk (A dum)Middle School - Kekawr tlawn leh pawnfen (Light Grey), Kamis a ban bul (A var), Pheikhawk (A dum)
High School School - Kekawr tlawn leh pawnfen (A dum), Kamis a ban tlawn (A var), Pheikhawk (A dum)
Higher Secondary School - Kekawr tlawn leh pawnfen (A dum), Kamis a ban tlawn (A var), Pheikhawk (A dum)
Post a Comment