OSCARS 2023 NOMINATION AN PUANG

 OSCARS 2023 NOMINATION AN PUANG

Lemchan khawvel a chawimawina sang ber Oscars 2023 (95th Academy Awards) chu Nomination puanzar a ni tawh a, Category hrang hrang a nomination hmu te an hraw hlawm viau.

Michelle Yeoh channa 'Everything Everywhere All at Once' chu Nomination hmu hnem berin category 11 zet ah a lang. 'All Quiet on the Western Front' leh 'The Banshees of Inisherin' ten dawt in nomination 9 an hmu ve ve a, Baz Luhrmann 'Elvis' (8) leh Steven Spielberg 'The Fabelmans' (7) te a hnuai leh ah an awm thung.

Category ngaihhlut tak Best Picture bik ah hian Film 10 lai chhawpchhuah a ni a, All Quiet on the Western Front, Avatar: The Way of Water, The Banshees of Inisherin, Elvis, Everything Everywhere All At Once, The Fabelmans, Tár, Top Gun Maverick, Triangle of Sadness leh Women Talking ten Award an inchuh ang.

Leading Actor nominee ah Colin Farrell, Brendan Fraser, Austin Butler, Paul Mescal leh Bill Nighy te hming a langsar a, Cate Blanchett, Ana de Armas, Andrea Riseborough, Michelle Williams leh Michelle Yeoh te leading actress nominations an ni.

2023 Oscars sem turah hian India pawh in beiseina sang tak a nei a, India atangin nomination 3 hmuh a ni a, hetah hian Golden Globes leh Critics Choice Award dawngtu SS Rajamouli’s RRR hla “Naatu Naatu” chu Best Original Song dawng thei tura chhawpchhuah a ni. India in Best International Feature category tur bik atana official entry a thlan 'The Last Film Show' erawh beisei a pha lo hle a, Nomination a hmu ve ta lo thung.

Hetih lai hian ‘The Quiet Girl’ in History a siam a, Irish-Language Film zinga Oscar nomination hmu hmasa ber a ni. 95th Academy Awards hi March 13 ah semchhuah a ni ang.