Buhban Khawtlangin Indian Science Congress kalte an hmuak

Rauthla News 13.January,2023 : January 3-7, 2023 chhunga Indian Science Congress vawi 108-na, RTM University Nagpur-a neih zawh tâka, STAM bul tuma Mizoram ai awha kal, Ruthi Lalremruati (Teacher) leh PC Lalremsiami Class X, Buhban RMSA Secondary school, Saitual District te lo haw chu January ni12, 2023 (Ningani) tlai dar 4 khan Buhban khawtlang chuan lo hmuakin, Buangkàwn-ah hmuahna inkhawm buatsaih a ni.

Mizoram aiawha kal Miss Ruthi Lalremruati leh PC Lalremsiami te hmuahna inkhawm hi Buhban Branch YMA - ten kaihruaiin Upa Vanlalngheta'n hunserh a hmang a. NGO hrang hrangte bakah, VC, Buhban Educational Staff Association, Presbyterian English School leh mimal hnen ațangin chawimawina thil pek, Citation leh Parțhi hlan an ni. Ruthi Lalremruati hian an project, 'Study on Generation of plastic waste and its management in Buhban Village, Mizoram' tih an buatsaih dan leh, District leh State level-a intihsiakna an kalpui dan te, Mizoram aiawha an kal chhuah dan leh an lo haw leh dan te ngaihnawm takin report a pe a, PC Lalremsiami (Child Scientist) hian an kalna chanchin a sawi bawk.

VC, YMA leh MUP aiawh thu sawi țha tak tak ngaihthlak a nih bakah Pu R Lalnunhlima Headmaster, Buhban RMSA Secondary School chuan thu a sawi bawk.

He inkhawm hi mipui lam pawhin an hlutin kal an țha hle a ni.

Science Teachers Association Mizoram (STAM) chuan Buhban Khawtlangin Indian science congress kalte hriatpuina, chawimawina, fuihna hun hmangin an lo hmuak hi lawmawm a ti a, Buhban khawtlang chungah lawmthu an sawi a, hun lo kal zel turah pawh Science zirnain hma a sawn zel theihnan lo tawiawm tlat turin a sawm a ni.