Lawngtlai, October 11, 2022 : Pu V. Zirsanga, Chief Executive Member LADC chuan vawiin khan Lawngtlai Bazar Venga Dokulha Hall-ah National Handloom Development Programme (NHDP) kal tlanga Mizoram Handloom & Handicrafts Development Corporation Ltd (ZOHANDCO) buatsaih State Handloom Expo 2022 a hawng.

Pu V. Zirsanga chuan, mihring thiamna, thahrui leh hun tam tak sen a ṭul avangin hnam changkang apiangin kuta thil siam an ngaisang tih sawiin, puan tah leh kut themthiam thil siam chhuah kawngah mahni intodelh mai ni lo va, ram danga thawn chhuah tham leh thawn chhuah tlak neih tum turin puan tahtu kal khawmte chu a chah a. 'Hnam nihna chu thisenah awmin, a lan chhuahna langsar ber erawh ṭawng leh inthuamnaah a ni a, inthuamnaah mahni hnam ziarang kan tarlan uar deuh deuh a ngai a, hnam ze mawi tak tak chu inthuamnaah chauh tar lang lo va, a taka kan nunpui theuh a ngai a ni', a ti.

CEM chuan, ZOHANDCO hma laknaa Mizoram chhunga kut themthiam leh la deh thiamte tana eizawnna kawng hawn zau zel a ni chu lawmawm a tih thu sawiin, an hna thawh chu kut hna thawh chawi sanna leh hnam ziarang humhalhna pawimawh tak a ni, a ti bawk.

October ni 11 aṭanga ni 14, 2022 chhung awh tur State Handloom Expo-ah hian dawr 31 hawn niin, he'ng dawrahte hian Mizoram hmun hrang hrang aṭangin tualchhuak puan leh thawmhnaw lam bakah, kut themthiam thil siamte man tlawm zawkin zawrh chhuah a ni.

Lawngtlaia State Handloom Expo 2022 hawnna hi LADC-a Chairman Pu VL Hmuaka bakah, Executive Member-te, office holder-te leh MDC-te, sawrkar official-te, tlawmngai pawl ai awh, political party ai awh, thu thar theh darhtu, puan tahtu leh mipui ṭhahnem takin an chhim a. Hun hman zawh hian Khuallian leh official-te chuan dawr (stall) hrang hrang an fang kual a, mipui tan dawr theihin hawn zui nghal a ni.

Post a Comment

Powered by Blogger.