Lawngtlai, October 28, 2022 : Nimin chawhnu khan Pu V. Zirsanga, CEM LADC hoin Gov't Bodoland Territoial Council Assam buatsaih 1st Inter Sixth Schedule Premier League - 2022 Football Tournament a tel LADC football team-te pualin, LADC Conference Hall-ah hun hman a ni.

Hun hmanpuitu Pu V. Zirsanga chuan, malsawmna chang turin thawhrimna, taimakna leh  teirei peihna a ngai tih sawiin, a nuam chin chauha hlawhtlin tum leh ke pente tan chuan hlawhtlinna tak tak a awm thei lo, a ti a, hlawhtling ngei turin engkawng pawh zawh ila, theih tawp chhuahin kan kan beih hram hram a ngai tawh a ni, a ti.

CEM chuan, Ram leh Hnam tan tiin infiamna khawvel ah kan District chhuahsanin State dangah ke kan pen a. A chungnungber ni lo mah ila, No mawi kan lo hawn thei hi a lawmawm a. In lakah hian ram mipuite hian beiseina sang tak kan nei tih hria ula, chu beiseina a hlawhtlinna chang tur chuan infiammite pawhin theihtawp chhuah a, mahni leh mahni pawh kan intihphur a ngai tak zet, a ti a. Hlawhtlinna dal theitu Ruihhlo leh thil chi hrang hrang lakah inthiar filhlim tlat turin infiammite leh thalaite a chah a ni.

Pu VL. Hmuaka, Chairman LADC chuan, Pu V. Zirsanga CEM kaihhruai sorkarin kan thalaite infiamna kawngah hma kan sawn theih nan theihtawp a chhuah mek tih sawiin, ' tunah pawh LADC player te thawhrimna zarah hun ropui tak kan tawng thei hi thil lawmawm tak a ni, a lawmawmnaah hian tawp mai lo se, theihtawp chhuah zel ila, kan sorkar pawhin infiammite hmasawn nan áš­an a la zel dawn', a ti.

Pu C. Hrangthianga EM (SYS Dept) LADC chuan kal khawmte lawmna thusawiin, he hun hman a nih theihna chhan chu Inter Sixth Schedule Premier League - 2022 Bodoland Assam a kal LADC Player te Football khelnaah hmingtha tak leh 1st Runner up ni thei hial khawpa thaa an khelh vang a ni tih a sawi a. Player-te chu LADC hminga State pawna inkhela kal chhuak hmasa ber an ni tih sawiin,, an puala hun hman hi an phu a ni, a ti.

He hunah hian Rev. H. Lalremtluanga, BCM chuan hunserh hmangin, Pu Lalropuia Chinzah EM in an kalna report a pe.

Post a Comment

Powered by Blogger.