Lawngtlai, October 14, 2022 : Mizoram Public Service Commission-in Combined Examination a buatsaiha Lawngtlai District atanga Mizoram Information Service a inziak tling Zonunchama Ralte, Lawngtlai-III leh David A. Lalhmingchhuana, Lawngtlai Council Veng te chawimawina hun chu vawiin khan Mizoram Journalist Association, Lawngtlai District te chuan Lawngtlai Press Club-ah an hmang.

Hun kaihruaitu Lawngtlai District MJA Vice President Pu Elvis Lalthangzuala chuan a vawikhatna atan MJA Lawngtlai District ten MIS tling thar te lawmpuina hun an buatsaih thu a sawi a. Tling tharte chu mahni hna a rinawm taka thawk tura chahin Pathian hnenah hun hlan tawngtai a nei.

Pu Lalngheta Ralte, MJA President chuan Lawngtlai District in Combined Service Exam atanga MIS tling thar pahnih kan nei thei chu lawmawm a tih thu sawiin, he hna hi hna zahawm leh hnathawh nuam tak a ni, a ti. MIS te leh MJA te chu hnathawh inang an nih avanga kawng engkima thawhhona tha tak an neih a ngaih thu sawiin, MIS a tling tharte chu khawi hmunah pawh awm se MJA te nen thawhhona tha tak hnuaiah mipui rawngbawl thin turin a chah bawk a ni.

Lawngtlai District Information & Public Relation Officer Pu C. Lalhruaitluanga chuan, MPSC in combined exam a buatsaihah Lawngtlai District atanga MIS tling thar an awm chu lawmawm a tih thu a sawi a. Hei hian thangthar lehkha thiam tak tak te tan chona duhawm tak a nih a rin thu a sawi a. Civil service ah hian hna sang bik engmah a awm lova, kan hna tlin taka kan thawh a, phur taka kan thawh hian hlawhtlinna chu kan chang mai thin a. Chuvangin, tuna MIS tling thar pahnih kan chawimawi mek te hian mahni hna chu rinawm taka thawk a. Sorkar thu pawimawh tak tak te, a hun taka mipuite hrilh hi kan hna anih dawn avangin inthlahdah lova rinawm taka kan thawh a ngai a ni, a ti. Pu C. Lalhruaitluanga chuan, MJA te'n an thil tih hi a ropui mai ni lovin, midangte cho chhuahna ropui tak a nih ngei ka beisei a ni, a ti bawk.

He hunah hian MIS a tling thar Zonunchama Ralte leh David A. Lalhmingthanga te pawhin lawmthu an sawi bawk a. MJA Lawngtlai District aiawhin Pu ZD. Dengngura leh Pu H. Lalrinmawia ten lawmpuina thuziak an hlan bawk a ni.

Post a Comment

Powered by Blogger.