Rauthla, October 31, 2022 : English Club lian Manchester United-in hmalam panin zelin nizan khan Old Trafford-ah an manager hlui enkawl West Ham chu sikhat faiin an lo hneh.
Red Devils boss Erik ten Hag-an an match hnuhnung bera field chhung luahlumtu hmasa, Victor Lindelof, Tyrell Malacia, Antony leh Alejandro Garnacho te aiah Harry Maguire, Luke Shaw, Anthony Elanga leh Marcus Rashford a dah lut a, Europa League-a Sheriff laka goal khungtu Cristiano Ronaldo-an bul a tan bawk. Victor Lindelof leh Raphael Varane inhliam vangin centre-back ah United-in duhthlan tur Harry Maguire chiah an nei. Inkhelh hma chuan United tantute thla a muang lo. Inkhelh zawhah erawh Hero ang maiin an chhuah thung.
United boss hlui David Moyes-an an match hnuhnunga an first eleven-a lut zawng zawng thlak vekin tlar hmaah tun season-a goal 2 nei tawh Italy striker Gianluca Scamacca dahin, Said Benrahma, Jarod Bowen leh Flynn Downes ten an thlawp.
Inkhelh tan a ni a, mual neitu lamin an nawr nghal a, Dalot-an rem taka Ronaldo tana ball a cross chu Marcus Rashford a lo inrawlh a, ho takin a chhuak. World Cup khelh tum Rashford hi a phur mah mah em aw a tih theih a. England-a an hotupa Gareth Southgate-an a thlir reng bawk nen, chet that a tum hle. Hemi hnu hian Anthony Elanga in chance a nei a, a thun lo. Sweden forward hi a tangkai lo tluan zak thung. Ronaldo pawn box pawn atngin shot neiin, West Ham keeper Fabianski tan harsatna a awm lem lo. Rashford inlarin box ding lam atanga a lakluh chu goal-ah a shot a, Dawson-an a lo dang per. Hemi hnu hian Dalot-a siam chu Fabianski hmaah a head thla. 38mins a ni a, inkhel a danglam ta, ding lam box bul atanga Eriksen-a ball vawrh luh chu Marcus Rahford chuan United tana a goal 100-na leh he inkhela United goal khatna ni turin kawh zetin a head lut. Christian Eriksen-a bawl vawrh a 'World Class' turu a, goal chhunga a luh theih nana Rashford a lo inkhawh phei bon lutuk leh he inkhel a a chetla hrim hrim kha Southgate-an a hmuh hmaih lovang. Ronaldo pawh tar chhia a la ni lo tih a lang a, he inkhelah hian shot vawi 6 a nei.
Second half-ah West Ham lam an rawn mar tan a, Dawson leh Said Benrahma ten shot nei nghalin, De Gea tan hlauhawm a ni lo. Scamacca la chhuakin Moyes-an Antonio a dah lut a, West ham goal bawh a na sawt. Tharum a ngah avangin United tlarhnung tan buaipui tham a tling. Casemiro-an hna a ngah sawt. Antonio hian 82mins-ah box pawn atangin mar zetin a shot a, De Dea-an a lo dang perh nalh hle. Hemi hnu hian Kurt Zouma'n box chhung atangin a head a, De Gea bawk a che leh a, goal pawnah a beng per hman hlauh. Ten Hag-an Eriksen la chhuakin Fred a rawn dah lut a, Fred hian 86mins-ah goal ban a tauh per nghal.
Hun tawp lam chu West Ham chan a ni deuh tawp a, United an bet hle. Bowen pet goal loh te, Rice-a free kick goal lo te chu West Ham sawi kumkhua a ni tawh ang.
He inkhelah hian Marcus Rashford a che tha hle a, Europa League-a goal a khung chhunzawmin, he inkhelah hian United chakna goal a khung a. shot vawi 5 neiin, channce vawi 1 a siam bawk. Sawisel hlawh Captain Harry Maguire Puja fuh zan a ni a. Ball clear vawi 8 neiin, a lu in vawi 5 a clear bawk. Block vawi 3 neiin, foul a nei lo. He inkhela sawi hlawh ber leh United chhandamtu chu David De Gea a ni. De Gea hian West Ham goal shot kawh leh sir tak tak chu a bengper hman tlat zel a. Save vawi 4 neiin, long range save vawi 1 a nei bawk. Lehlam pawlin an shot a save te kha Goalkeeper naran tih theih a ni lo. Spain coach Luis Enrique-an kha inkhel kha a en ve ngei ang a, World Cup khel tura De Gea a thlang lo chu pawi a tih ve ngei a rinawm.
Post a Comment