Lawngtlai, October 14, 2022 : Sorkara an thil phut tihhlawhtlin a nih theih nan Lawngtlai Auto Rickshaw Onwer's Association chuan Lawngtlai sorkar office lian ṭhenkhat dan chhunzawm an la tum.
Mizoram sorkarin Auto permit thar 68 a pek chhuah hnukkir tura sorkar an nawr nan hian October 12 & 13, 2022 khan DTO office kai tur dangin, vawiin atang khan DTO office bakah Lawngtlai DC Office leh a chhehvel a Office dang, DRDA, Taxation, District Court leh BDO Office a thawktute pisa kai tur an dang.
Vawiin khan Lawngtlai DTO, Pi B.Malsawmtluangi chuan Director, Transport Department hova meeting thuchhuak chu Auto Rickshaw Owners Association hruaitute hi a hrilh a, Director hova meeting chuan Stand chungchangah Stand siam theitu chu LADC a nih thu an sawi a, State Transport Authority in permit a pek te chu lei leh hralh phal a ni lova, a hria chuan DTO emaw MVI ah report a, cancel tura hmalak nghal tur a nih thu te, Permit chu STA in dan ang thlapa a pek a nih thute tarlan a ni a, Lawngtlai Auto Rickshaw Owners Association te lungawilohna chu STA in a hriat tawh thu leh STA Member te chu chawpchilh taka inkohkhawm mai theih a nih loh vangin remchang hmasa berah ngaihtuah a nih tur thu te sawi lan a ni bawk. Sorkar lam hian office kai tur an dan chu titawp turin an ti bawk.
LAROA chuan permit thar hnuhkir chu an duh ber a ni tih an sawi a. An lungawina khawp thu lawmawm an hmuh hma chuan office kai tur dan hi tawpsan an tum loh thu an sawi a. Naktuk hian DTO office bakah, DC office Lawngtlai leh a chhehvel office kai tur dan an tum leh tih an sawi a. Naktuk aṭang chuan a nawlpuia dang lovin hruaitu chin chauhin office kai tur hi an dang dawn a, naktuk aṭang chuan Auto service pawh a awm ang.
Vawiin khan LAROA chuan thuchhuah siamin, tuna Lawngtlai khawpuia Auto Rickshaw service hian Lawngtlai mipui te an phuhru zo tih sawiin, LADC-in census a neih hnuhnung berah Lawngtlai town ah mihring 31715 awmin, mihring cheng zawng zawng atanga chhutin Auto Rickshaw pakhat hian mi 70 vel a phur anga chhut a ni a, tin, in ding lai 6354 awmin, in 14 in Auto Rickshaw pakhat intawm ang kan ni bawk. Heta tang hian Auto Rickshaw hmang thintu te hi mi 20 vel awm anga ngaih a ni a, heng zingah hian Lirthei tam tak nei an awm bawk a ni. A chunga tarlan atang hian tun dinhmunah Lawngtlai khawpui hian Auto Rickshaw permit hi a mamawh belh tawh lo a ni, an ti.
Sorkarin Auto Rickshaw permit 68 a pe chhuak leh a nih chuan harsatna nasa tak a siamsak dawn tih sawiin, Auto service mek te hian oil man paih in nikhatah Rs 600 te, a hlawh tha pawlin Rs 1000 hlawh chang te an nei tih sawiin, Tin, Loan hmanga Auto leite, mi inhnuai luaha harsa taka nupui fanau enkawla eizawngte kan nih avangin tuna eizawng mekte tan hian harsatna nasa tak kan tawk dawn a, Sawrkar hian tuna eizawng mekte hi min ngaihtuah se kan ti a ni, an ti.
Tun dinhmunah Lawngtlai khawpuiah hian Auto stand 4 (pali) a awm mek a, Stand paliah te hian Auto 59 kan leng thei a, nikhatah Auto service hi 250 vel kan awm a, Auto 200 vel hi stand chang lo, service lo tihna kan ni a, heng zingah hian Associaton member ni lo tam tak an bawk a ni, an ti a. Sorkarin Auto permit hi a pe chhuak leh a nih chuan tunai hian Lawngtlai khawpui chhung traffic a buai phah thei dawn, an ti.
LAROA chuan Auto permit hralh chhawng leh turte hnena Permit pek hi a do tlat tih sawiin, Sorkar-in permit -68 pek chhuah tur a tih chhuah zingah a hmu tur awm ngawih ngawih te pawh an awm laiin, a hmu te zingah sorkar hnathawk lai te, chhungkaw khat atanga mi pahnih pathum hminga hmu te an awm a tih LAROA chuan a hria, tih an sawi a. Hengte avang hian LAROA chuan Permit hmu, zuar chhawng leh turte hnena Permit pek hi tha a ti lova, a do tlat a ni, an ti.
Post a Comment