Lawngtlai, September 12, 2022 : BJP State President Vanlalhmuaka chuan, MNF te hi a hranin Central-ah hek an ngailo, an thusawi leh an thiltih hmang hian an inhek mai zawk a ni, a ti a. Central Sorkar an dawr dawnin NDA ah BJP te nen thawk dun annih thu hahip in an sawi a, Mizoramah erawh BJP chu thawhpui chi an nih loh thu an sawi leh maithin. An nihna diktak chu lehlama awr dum, lehlama awr sen a ni, a ti.
Inrinni zing dar 7:00 khan BJP Lai Autonomous District Hqrs: Lawngtlai chuan Lawngtlai Bazar Veng @ Areopagi-ah Public meeting an nei a, he hunah hian ADC in thuneihna lian a neih theihna tura BJP hmalak mekna te puanzar a ni. He huna thusawitu BJP State President Vanlalhmuaka chuan, He MNF Sorkar hian thuneihna a chan hnuah sum lamah harsatna nasa tak a tawk a, Covid-19 khan eng emaw chen chu a chhanhim zawk niin a lang. Hripui avang khan Central atangin sum tam tak an dawn phah a, hei hi Central BJP in a mipuite harsatna an tawh a duhloh vang zawk a ni. Vawiin niah phei chuan, a hnuai hnathawk hlawh pawh a hun takah a pe thei tawhlo a, ba lah chu a ngah em em a, sum leh pai enkawl kawngah a fail chiang hle a ni. Mipuite hnenah cheng nuai 3 intiam kha singnga ah tla thlain, tunah phei chuan, 25,000 ah a tla thla leh tawh thung a ni. Chuvangin, he sorkar kan hrawn mek hi sorkar zui zel tlak anni tawhlo tih a chiang a, mipuite i harh ang u. Hei hi ka sawi duh a ni, kum 2023 ah khian Mizoramah hian BJP telna Sorkar hi a ding ngei tawh dawn a ni tih hi, a ti.
Pu Vanlalhmuaka chuan BJP hi India ramah Hindu lalram din tum, Kristiante tihduhdahtu tiin kan ramah hian sawi a ni thin a, hei hi thudik tak hriatloh vang leh party thenkhatin BJP lian zel tur an hlauh avanga diklo taka propaganda an vawrh mai mai a ni. India rama Kristian tihduhdahna thleng thin hi uluk zawkin zirchiang ta ila, Congress Sorkar na State a thil thleng thin zawk a ni a, thiam takin Congress Party hian BJP thiltih angin lantir dan a zawng a, mahse, BJP thung chuan, chutiang harsatna thlentu chu manin, hremna a pe zawk thung a ni, a ti.
Pu Vanlalhmuaka, State BJP President chuan BJP chu a thil tumah a chiang a, mipuite hnenah kan ti ang tia a sawi chu a ti maithin a ni. Autonomous District Council te pawh thuneihna lian zawk in neih theihna tura hma la mektu leh pek tum tu che u chu BJP hi a ni. State a MNF Sorkar erawh chuan in thil dil mek hi comments a peknaah, negative comments a pek sak che u a nih kha. Hetiang chunga ADC Area-ah MNF Party a kan la awm duhte hi nguntakin ngaihtuah teh ang u, thil zahthlak tawpkhawk a ni. Hnama min dintu hi Pathian a ni a, tawng min petu pawh hi Pathian a ni. Tuna kan awm danah hi chuan, hnam bo tur zia hi kan pu a ni. Thuneihna lian zawk inneih theihna turin BJP chuan theihtawp a chhuah a, Prime Minister Pu Narendra Modi pawh keimah hoin, a chenna hmunah ngeiah in hotute nen kan hmu a. State President ka nihna angin, he inthil dil mek hi ka support tlat che u a ni. Chuvangin, he ram leh hnam hian malsawmna a dawn theihna turin BJP hi kan belh tlat a ngai a ni, a ti.
Post a Comment