Lawngtlai, Augst 31, 2022 : Lawngtlai East Bialtu MLA, Agriculture Development Board Vice Chairman Pu H. Biakzaua chuan nimin khan Mizoram Sawrkar Flagship Programme - Socio-Economic Development Policy (SEDP) hnuaia chhungkaw hmasawnna tinzawna eizawnna ngelghet bul tanpuina tur Family Oriented SEDP chu Lawngtlai District tan a hawng.
Lawngtlai-III-a CYLA Hall-a SEDP hawnna inkhawmah hian Pu H. Biakzaua chuan, Family Oriented SEDP chu Mizoram pumah beneficiary mi 60,000 hnenah 1st instalment pe chhuak phawt tura ruahman a ni a, assembly constituency tinah beneficiary 1,500 theuh an awm tih sawiin, Lawngtlai District chhunga SEDP beneficiary-te chu tih tak takna nena bul tan tur leh a hlawhtlin ngei theih nana theihtawp chhuah turin a chah a. Family Oriented SEDP chu a tira ruahman angin a tahtawla kalpui chhoh zel tum a ni, a ti.
Lawngtlai East Bialtu MLA chuan, Sawrkar Laipui atanga Sawrkarin sum a dawn tur a dawn tak loh, a hloh cheng vaibelchhe 3,000 vel zet a awm laiin, COVID-19 hri leng avang te, lirnghing leh khuarel chhiatna avang te, ramri buai avang te, raltlan buaipuinaah te leh ASF avang te'n ruahman lawk lohva sum hman tulna Sawrkarin a hmachhawn a, chuti chung chuan hmasawnna hna thawh a chawl chuang lo a ti.
Pu H. Biakzaua hian Village Level SEDP Committee te inrelbawlna tur (admin cost) chu Lawngtlai District chhunga assembly constituency pathum atanga VLC thlan chhuah 3 theuh hnenah cheque-in a hlan nghal a. VLC tin hian beneficiary an ngah dan azirin beneficiary pakhatah Rs. 300/- zel hisapin admin cost hi an dawng vek dawn a. Khuallianin a sem bak hi vawiin vek khan DC Office a?angin VLC tinin an lak nghal theih turin ruahmanna siam a ni bawk.
Lawngtlai District a SEDP 1st Instalment dawng tur hian District chhunga khua 187 atangin chhungkua 4500 thlan an ni.
Post a Comment