Rauthla, August 16, 2022 : Tunlaia social media-a mi pakhatin hmeichhe nau paw lai a sawisa lai video a darh chungchangah Mizoram State Commission for Women chuan thubuai an ziak lut a. Sawisatu nia Lalramdinsanga (25) s/o SB Gurung Siahatlah-II, Siaha chu vawiin khan Police ten an man a, Siaha Police Station-ah kawl mek a ni. Kutthlak tuartu Pi Lalnunemi (24) d/o Ramthapuma, New Siaha West lam mi a ni.
15th August, 2022 khan social media-ah mipa pakhatin hmeichhe pakhat nau paw lai nia lang chu a sawisa lai video, second 30 vel bawra sei chu vawrh darh a ni a. Chu video atanga a lan dan chuan mipa pakhat T-shirt pawl ban bul leh kekawr tlawn ha hian In chhungah hmeichhe nau paw lai chu sawisain chhuata nau paw chunga hmeichhe let reng chu mipa chuan a pet a, a nau puak lai nena hnuk sawn bawkin hmeichhia chu a tlawh leh zawt a, mipa chuan duh tawk mai lovin a bula thingfak chuan hmeichhia, naute nu ni ngeia hriat chu a vaw zui bawk a, naupang tap rawng rawng thawm hriat tur a awm bawk. Video-ah chuan Mizo tawng an hmang a, chu vang chuan he thil thleng hi Mizoram chhung ngeia thleng nia ngaih theih a ni. He video-a lang chin bakah hian thil tam tak, hmeichhia leh naupang/nausen chungah hian kut inthlakna leh hleilenna dang a thleng ngeia ngaih theih a ni tih Mizoram State Commission for Women chuan an sawi.
Ngun taka thil awm dan thlir a nih hnuin video lo lang hmeichhe nau paw lakah hian hmeichhe zahawmna leh dikna chanvo tihbawrhbanna nasa tak a thleng ngei niin commission chuan a ngai a, nunrawng taka kut inthlakna - pet, tlawh leh thingfaka vuakna thleng nia video a langte, naupang pawi sawi lo chunga tawrhna thleng nia lang te chu rang taka chhui chian ngai niin commission chuan a hria a, hemi vang hian commission chuan 'suo moto cognizance' lak ngei theihna tur case niin a hria a, MSCW case (Suo moto) Case No. 45/2022 a ziak lut a ni.
He video a lo lang hmeichhia leh a fa chunga hliam leh na tawrhna thleng a awm a nih chuan an nufa dinhmun kimchang leh an hliam tawrhte enkawl zui a nih dan kimchang commission hnena report pe tel turin beisei a ni bawk.
MSCW chuan video hmuh nuam lo tak chu social media a tarlan zui zel a nih loh nan he video kawltu zawng zawng, sawrkar thuneitute tih loh chuan delete hram turin a ngen.
Thil thlen hun hun hi August 13, 2022 tlai dar 6 vel niin an sawi.
Post a Comment