Rauthla, July 4, 2022 : Mizoram Assembly Speaker Pu Lalrinliana Sailo chuan chuan inrinni, July 2, 2022 khan National Highway kawngpui laih zau hna thawh mek, Lawngtlai leh Thingfal inkar chin, National Highways and Infrastructure Development Corporation Limited (NHIDCL) enkawlna hnuaia thawh mek chu tlawhin, an hnathawh kal lai mek a enfiah a, duhthusam lo lai awmte chu a rang lama siam ṭhat hna thawk turin NHIDCL Project Manager chu a ngen nghal.
Speaker Pu Lalrinliana Sailo chuan National Highway kawngpui zauh hna thawh mek chu Mizoram mai bakah, India ram tan pawha kawngpui ṭangkai a nih dawn avangin a ṭha thei ang bera thawh a pawimawh thu sawiin, hna thawktute chu neitu rilru pu-a ṭhahnem ngai taka thawk turin a chah a. Kawng kual leh awih dan te, tuiluankawr ruahman dan leh hna hrang hrangah a bulṭhut aṭanga uluk taka thawh a pawimawh thu a sawi a. Kawng thlang lama lung rem ṭhenkhat duhthu sam lo lai leh kawngpui sir thlang lam tlang khi ṭhenkhat siam ṭhat ngai laite leh hna thawh fuh tawk lova a hriat laite chu hna viltute hnenah a thlen nghal bawk.
Speaker hi Lai Autonomous District Council-a Executive Member Pu C. Hrangṭhianga leh MNF District Headquarters Lawngtlai hruaitu ṭhenkhatte'n an ṭawiawm a ni.
Post a Comment