Lawngtlai, July 12, 2022 : Vawiin khan Lawngtlai District Development Co-ordination and Monitoring Committee (DISHA) chu an Chairman, Member of Parliament (Lok Sabha) Pu C. Lalrosanga hovin Lawngtlai DC Conference Hall-ah an ṭhu khawmin, Sawrkar kum kal mek 2022-23 chhunga Lawngtlai District-a sawrkai laipui ruahmanna hnuaia hmasawnna hna hrang hrang kalpui tawh chin thlir ho niin, harsatna awmte leh a chin fel dan tur leh hma lak zui zel dan tur te sawi ho a ni.

Chairman Pu C. Lalrosanga chuan DISHA chu ram hmasawnna tura sawrkar ruahmanna (scheme) hrang hrangte tihhlawhtlinna kawnga ṭha zawka hna thawh a nih theih nana mipui ai awha thlan chhuah te, a hna kalpuitu sawrkar hna thawk leh tlawmngai pawlte nena inrawn khawmna leh sawi hona hmun pawimawh tak a ni, a ti a. Hmasawnna hna hrang hrang enkawltu leh viltute chu ṭan lak ngaihna lai leh ngaih pawimawh lai turte zir thar nan hman thiam tum turin a chah a ni.

He DISHA ṭhut khawma sawrkar laipui scheme hrang hrang sawi hote chu - PWD hnuaia Pradhan Mantri Gram Sadak Yojana (PMGSY); P&E Department hnuaia Indo-Bangla Border Flood Lighting (IBBFL) Scheme & utility shifting due to widening of National Highway; PHED hnuaia Jal Jeevan Mission (JJM) & Swachh Bharat Mission-Grameen (SBM-G); UD&PA hnuaia Pradhan Mantri Awaas Yojana-Urban (PMAY-U) & Swachh Bharat Mission-Urban (SBM-U); H&FW Department hnuaia National Health Mission (NHM); Social Welfare Department hnuaia National Social Assistance Programme (NSAP) & Integrated Child Development Scheme (ICDS); FCS&CA Department hnuaia National Food Security Act (NFSA); Commerce & Industries Department hnuaia Prime Minister Employment Generation Programme (PMEGP); DRDA hnuaia Mahatma Gandhi National Rural Employment Guarantee Act (MGNREGA), Pradhan Mantri Awaas Yojana-Grameen (PMAY-G) & Pradhan Mantri Krishi Sinchayee Yojana (PMKSY) 2.0; BDO-te hnuaia Border Area Development Programme (BADP), Mizoram State Rural Livelihood Mission (MzSRLM) & Deen Dayal Upadhyaya - Grameen Kaushalya Yojana (DDU-GKY); Samagra Shiksha leh Bharat Sanchar Nigam Limited (BSNL) hma lakna te a ni.

He DISHA ṭhut khawma tar lan dan chuan, DRDA kal tlanga hna thawh MGNREGA hnuaiah Lawngtlai District-ah job card 35,932 awm mekin, kum 2022 April - June thla chhungin chawh rualin ni 28 inhlawhna siam tawh a ni a. Job card Aadhaar seeding tih tawh zat hi 98.08% a ni. April - June, 2022 inkarah material component aṭanga hna thawh 1,146 awmin, hna 335 thawh zawh tawh a ni a, thawh lai mek 811 a awm.

He DISHA ṭhut khawmah hian Lai Autonomous District Council (LADC)-a Chief Executive Member Pu V. Zirsanga, Member Secretary & Lawngtlai Bawrhsap Pu Amol Srivastava leh DRDA Project Director Pi Marilyn Rualzakhumthangi bakah, sawrkar official-te, bank leh tlawmngai pawl ai awhte an tel a ni.

Post a Comment

Powered by Blogger.