Lawngtlai, July 14, 2022 : Nimin khan Lawngtlai DC Conference Hall-ah Lawngtlai Bawrhsap Pu Amol Srivastava hovin Lawngtlai khawpui chhung faina leh thianghlimna kawnga hma lakna tur leh chhehvel leilung leh boruak humhalhna kawnga hma lakna tur hrang hrang sawi ho niin, he hunah hian Lawngtlai khawpui chhunga veng tinah faina kawnga hma latu tur village level cleanliness committee din vek ni se an ti.

He hunah hian state department leh Lai Autonomous District Council-a official-te, Central Young Lai Association leh Merchant Association ai awhte an kal khawm a. District Level Sanitation Task Force, District Level Committee on Elimination of Single Use Plastics (SUPs), District Water & Sanitation Committee, District Level Monitoring Committee on Compliance of Environmental Laws leh District Bio-Medical Waste Management Committee hnuaia hma lakna tur hrang hrang  sawi ho a ni.

He hunah hian Lawngtlai khawpui chhunga veng tinah faina kawnga hma latu tur village level cleanliness committee din vek ni se tih te, PHED hnuaia bawlhhlawh sawngbawlna - solid waste management centre sak tur chungchang te, hman khat daih sarang (single use plastic) hman khapna a hlawhtlin theih nana hma lakna tur te, sawrkar sikula faina inzirtirna kalpui te rel a ni a. Hman khat daih sarang chi hrang hrang hman chhunzawm a nih loh nan a zuartute leh sumdawngte nen thawk hova hma lak dan ngaihtuah ni se, tih a ni bawk. 

Post a Comment

Powered by Blogger.