Rauthla, June 14, 2022 : Haryana-a Khelo India Youth Games neih zawh takah nimin khan Mizoram team chuan Kerala chu 5-1 hnehin an champion a, Mizoram team captain hi Vaseikai, Lawngtlai District tlangval Joseph Lalmuanawma a ni.
Khelo India Youth Games-ah hian football bikah Mizoram hi Kerala, Goa, Punjab te nen group khatah awmhoin, Mizoram hian Kerala hi 5-0 in an hneh a. Goa chu 2-0 an hneh a, Punjab nen hian goal inpe lovin an inhnehtawk. Semifinal-ah Mizoram hian Karnataka 4-0 in an hneh a, final-ah Kerala chu 5-1 in an hneh leh a ni.
Vaseikaia piang Joseph Lalmuanawma hi Mizoram aiawhin vawi li a fehchhuak tawh a, Subroto Cup ah tum hnih fehchhuakin, Khelo India Youth Games ah tum hnih a fehchhuak tawh bawk a, hengah hian team innghahna a ni pha vek. Tunah hian Aizawl FC U-18 tan a khel mek.
SYS U-17 Mizoram Academy-a awm lai leh Mizoram tana a fehchhuah lai vel hian Aizawl FC chuan biain, trial nei lovin an U-18 team ah an senglut a, Aizawl FC U-18 tan MPL U-18 ah pawh khan a thawhhlawk hle.
Aizawl FC U-18 right-back Joseph Lalmuanawma hian kan hnung March thlaa MFA Cup Saituala neihah khan Lawngtlai FC tan a khel bawk a ni.
Post a Comment