Lawngtlai, June 26, 2022 : Zanin, June 26, 2022 khan Council Veng, Lawngtlaia Volleyball Club ding thar R&M Volleyball Club Jersey thar tlangzarhna chu Pu Elvis Lathangzuala Inah neih a ni.
Tlangzarhna hun hi Pu B. Lalchuanvela, Coach-in a kaihruai a, Pu Lalchuanvela chuan, 'Infiamna hian rilru hrisel min neih tir a, depression lakah pawh min veng thei a. Midang hip tura theihtawp kan chhuah a ngai a ni' a ti.
Pu K. Lalchanzuala hnen atangin Club in dinchhoh dan report ngaihthlak niin, player-te leh coaching staff te inhmelhriattirna a nei.
R&M Volleyball Club Jersey thar hi Pu V. Lalramnghaka, President, Lawngtlai District VC Association chuan a tlangzarh a, V. Lalramnghaka chuan, 'Council Veng hi Lawngtlai Volleyball-ah hmingthatna tam tak lo nei tawhin, Volleyball hmasawnna kawngah pawh an thawhhlawk hle a, hetih lai hian tun hnaiah volleyball chu a muhil deuh a ti theih a, hemi kaitho tura Pu Elvis Lalthangzuala te chhungin hma an la hi thalaite tan a lawmawm hle a ni' a ti a. Volleyball chu team work a ni a, thawhhona ṭha a ngai tih thu a sawi bawk.
R&M Volleyball Club hi Pu H. Remmawia leh Pi C. Vanlalrimawii te pualin June 1, 2022 khan din a ni a, tunah hian he club-ah hian player 13 in ziaklutin, Coach leh Asst. Coach te a awm a ni.
June 27-30, 2022 chhung hian Lawngtlai Vengpui Field-ah DVA Lawngtlai Season Opening Tournament neih a ni dawn a, he tournament-ah hian R&M Volleyball Club te hi an tel dawn a, an match hmasa berah Paithar an hmachhawn ang.
Post a Comment