Lawngtlai, June 8, 2022 : Vawiin khan India Independence kum 75-na lawmna, "Azadi ka Amrit Mahotsav" kal zelah Lead Bank Office, Lawngtlai huaihawtin sawrkar laipuiin mipuite hamṭhatna atana bank kal tlanga hma lak theihna a ruahman hrang hrang Lawngtlai District chhunga a chhawrtu tur mipuite hnena puanzarna, "Credit Outreach Programme" chu LADC Conference Hall, Lawngtlaiah buatsaih a ni.
State Bank of India (SBI), Lawngtlai Branch-a Assistant Branch Manager Pu F. Lalbiaksiama chuan hun kaihruaiin, programme buatsaih chhan a sawi fiah a. Mizoram Rural Bank, Lawngtlai Branch-a Chief Manager Pu Joseph Lalremruata chuan eizawnna leh sumdawnna bul ṭan nana sawrkar aṭanga puihna leh loan lak theihna, "Prime Minister's Employment Generation Programme (PMEGP), Pradhan Mantri MUDRA Yojana (MUDRA) leh Pradhan Mantri Awaas Yojana (PMAY)" chungchang te a sawi fiah a. Khadi and Village Industries Board (KVIB), Lawngtlai aṭangin Pu TH Vanlalfela chuan PMEGP loan dil turte tana hriat tur pawimawh a sawi a. SBI Lawngtlaia Assistant Branch Manager Pu F. Lalbiaksiama chuan loan rulh ṭhat pawimawhna, "NPA, CBIL, etc." chungchang a sawi fiah bawk a. Zawhna leh chhanna hun hlawk tak hman zui a ni bawk.
He hunah hian he'ng sawrkar ruahmanna hrang hrang hnuaia loan leh hamṭhatna ngaihven mi eng emaw zat an kal khawm a ni.
Post a Comment