Lawngtlai, April 23, 2022 : Vawiin khan India Independence kum 75-na lawmna, "Azadi ka Amrit Mahotsav" kal zelah Food, Civil Supplies & Consumer Affairs, Lawngtlai District office huaihawtin sawrkar laipui ruahmanna Pradhan Mantri Garib Kalyan Anna Yojana (PMGKAY) pualin Lawngtlai DC Conference Hall-ah hun hman a ni a. Department official-te, Consumer Association ai awh te, retailer-te, PMGKAY beneficiary-te leh chanchinbu mite an tel.


He hun hi Lawngtlai Bawrhsap Dr Andrew H. Vanlaldika'n hmanpuiin, sawrkarin mipui hamṭhatna tur ruahmanna hrang hrang a siam leh insenso pawh huama mipui hmakhaw ngaia hma lakna a kalpui ṭhin chu mi harsa zawkte tan thil lawmawm tak a nih thu a sawi a. Sawrkar leh FCS&CA department-in theih tawp a chhuah zarah buhfai leh eirawng bawlna gas-ah pawh harsatna lutuk awm lovin mipui an awm thei tih sawiin, mipui rorelnaa awm nihlawhthlakzia hre thar leh turin kal khawmte chu a chah a ni. Mi tam takin sawrkar an ral thlir a, sawrkar hma lakna ṭha tak tak pawh a ep zawng leh sawisel tur chang rana an awm ṭhin chu thil hriat chian tawk loh vang a nih thu sawiin, sawrkar hna thawkte chu sawrkar chhiahhlawh an nih thu leh sawrkar chu mipui an nih thu a sawi a. Sawrkar ruahmannate a hlawhtlin nan mipuiin theih tawpa thlawp leh thawhpui a pawimawh a ni, a ti.

He hun hi Lawngtlai District Civil Supplies Officer Pu Lalrinsanga'n kaihruaiin, hun hman chhan a sawi fiah a. ADCSO Pu Lianchhuma Chinzah chuan PMGKAY scheme chungchang leh Lawngtlai District chhunga kalpui dan report a pe a. Lawngtlai District Consumer Association President Pu B. Lalhuma hnen aṭangin thu sawi ngaihthlak a ni bawk.

Sawrkar laipui scheme PMGKAY hnuaiah hian mi harsa, National Food Security Act (NFSA) beneficiary (AAY leh PHH)-te tan a thlawnin buhfai thla khatah mi pakhat zelah kg 5 sem ṭhin a ni a. COVID-19 hri leng karah mi harsa chhuanchham an awm loh nana ruahman niin, April, 2020 aṭanga sem ṭan chu December, 2020 thleng kalpui a ni a. A thawh hnih nan April, 2021 aṭanga chhunzawm leh niin, November, 2021 thleng kalpui leh a ni a. Kumin 2022-ah hian January aṭanga sem ṭan leh niin, March, 2022-a tawp tura tih a ni a; COVID-19 hri lengin ziaawm lam a pan theih loh avangin Prime Minister chuan September, 2022 thleng a pawt sei leh ta a ni.

DCSO Lawngtlai hnuaiah PMGKAY kal tlang hian April – December, 2020 (thla 9) chhungin a thlawnin buhfai quintal 24,448.60 sem niin, dailuah quintal 332 leh chana quintal 531.11 sem a ni bawk a. April – November, 2021 (thla 8) chhungin buhfai quintal 16,284.55 sem leh niin, January – April, 2022 (thla 4) chhungin buhfai quintal 9,002.35 sem chhuah a ni tawh bawk a. April, 2022 hian DCSO Lawngtlai hnuaiah PMGKAY beneficiary 44,949 awmin, PMGKAY kal tlanga a thlawna buhfai sem tawh zawng zawng zat hi quintal 49,735.50 a ni.

PMGKAY buhfai sem tur zat (allotment) hi thla tin ni 20 bawr velah ration card data (NFSA) mila tihchhuah ṭhin a ni a. Ration quota sem chhuah a nihin, a hnuaia tar lante hi zawm ngei tura tih a ni:
1. PMGKAY ration hi retailer-te hnenah a thlawn (free of cost)-a pek chhuah tur a ni a, retailer-te hian beneficiary-te hnenah a thlawnin an sem zui tur a ni.
2. Fair Price Shop allotment zawng zawng hi digitised nena inmil thlap tur a ni a, allotment copy hi retailer tin te hnenah pek ṭhin a ni.
3. Allotment Order hi tihchhuah a nih rualin Departmental Transparency Portal mizorampds.nic.in -ah upload nghal ṭhin a ni a, a duh apiang tan en theihin a awm ṭhin.
4. PMGKAY scheme hnuaia buhfai a thlawna sem tur hi Supply Centre ṭhenkhatah buhfaia dawng kim hman lo an lo awm a nih pawhin an stock neih sa aṭanga pek chhuah tur a ni.
5. PMGKAY scheme hnuaia buhfai a thlawna sem hi mipuiah a tam thei ang ber puanzar ṭhin a ni.

PMGKAY scheme hnuaia NFSA ration card neite hnena a thlawna sem tur buhfai hi sawrkar laipui aṭangin kum 2015 NFSA beneficiary zat hisapin dawn ṭhin a ni a. Tun dinhmunah beneficiary hi a hma aia an tam tawh avangin, state sawrkar chuan PMGKAY scheme atan hian thla tin buhfai quintal eng emaw zat a chawi belh ṭhin a. Khua leh tui mi harsa zawkte tan chawi belh chungin sawrkar chuan he scheme hi khaihlak lovin a la kalpui zel a ni.

Post a Comment

Powered by Blogger.