Aizawl, April 14, 2022 : MIZORAM FIRST chuan nimin, April 13, 2022 khan Aijal Club-ah environment humhalh chungchanga inrawnkhawmna an buatsaihah a, he hunah hian Mizoram environment chhe mek siamthat leh venna tur kawng hrang hrangte sawi ho a ni.
Environment humhalh chungchanga ngaihpawimawh hmasak tur leh hmalak dan tur inrawnkhawmnaah hian kalkhawmte chuan, sorkar leh pawl angin kawng hrang hrangah hmalakna a awm tih sawiin, heti chung hian hmabak tam tak a la awm ngei tih sawi chhuah a ni.
Hemi chungchangah hian, Mizoram hian neitu rilru tak tak pua enkawl a mamawh takzet thu sawi chhuah a ni a. Tuna kan kal anga kan kal chuan rei lote ah Mizoramin tui, ramngaw leh leilung atanga kan hmuh kan mamawh tam tak hi hmu lovin Mizoram hi chenna tlaklohah a awm thei mai dawn a ni tih sawichhuah a ni. Sorkar, pawl leh mimalin kan tihtheih tam tak a awm laiin, zirlaite thinlungah environment venhim pawimawhzia thuk taka tuh a tul zia an sawi bawk.
MIZORAM FIRST chuan environment humhalh chungchang kawnga thawk mekte nena thawhho zel a tum a. Sorkar, pawl leh mimal thahnemngaite thawhpuiah a sawm vek bawk a ni.
Post a Comment