Rauthla Editorial, March 29, 2022 : Tunlaiin Social media platform thenkhat Facebook, Whatsapp, Instagram leh Twitter kan hmang nasa sawt hle a. A tel lovin nunphung a khaihlak a, kalphung a khairual thei ta meuh lo.
A thenin mangkai takin kan hmang a, news platform atan te, rawngbawlna atan te, sumdawnna atan te leh thildang tam tak atan kan hmang a, a then ve thung chuan atha lo zawngin, sex business atan te, smugling business atan te leh sual rawngbawlna thahnem takah an hmang.
India hi social media hmang tam ber ram kan ni mek a, Facebook hmang tam ber kan ni a, 340m in kan hmang mek a, Whatsapp hi 487.5m in kan hmang a, khawvelah a hmang tam ber kan ni a. Instagram hi 230.25m in kan hmanga, khawvelah a hmang tam ber kan ni mek a, Twitter hi 23.6 in kan hmang a, khawvela a pathumna kan ni.
Heti fakaua social media hmang tam kan ni chung si hian social media hmanga kan sum lakluh erawh a tlem hle. A chhan nia lang chu heng social media hrang hrangah te hian India kutchhuak a tlem vang a ni a, India kut kutchhuak kan ngaihsan loh vang a ni bawk. Ram dang social media platform kan hmang nasa a, a hlawkna chu ram dangah vek a kal.
Tuna ka sawi tum tak chu news platform atana social media kan hman dan leh a him leh him loh te, belhchian dawl a ni em tih te leh thildangte a ni.
Tunlaiin social media kan hmang nasa a, news tharhlamah hriatna kawngah leh post-na kawngah pawh kan leklam ber a ni ta. Hetih lai hian social media-a chanchin thar kan hriat thenkhatte hi belhchian dawl lo, inhnialna tichhuak thei, khua leh khua, veng leh veng intihbuaina tichhuak thei, politic tuinu tichhuak thei a tam viau mai. Hei vang hian social media-a chanchin thar kan hmuh/hriat tam tak hi thlitfim loh leh him lo a tam mai. Mainstream media kan tih, Print media leh TV news ang chiah erawh chanchin thar awm ang angte chu ngun taka thlitfim a ni a, politic, ram, khua, mipui, kohhran tan a him a ni tih finfiah a nih hnuah tarlan thin a ni.
Whatsapp, Facebook tih velah a hman hmanin chanchin thar kan siam a, ‘ka post hmasa lovang’ tih hlauin thudik a ni em? Midang tan a pawi thei em tih ngaihtuah hmasa lovin post kan siam tawp ta thin a. Hei hian thil pawi tak a thlen fo bawk a ni. Mipuite pawhin Social Media post nazawng hi rin bur vek lem loh a tha a, a him bawk. Print media leh TV news lam ten ngaihtuahna fim tak senga news an siam hi a rintlak a, belhchian a dawl bawk a, a him bawk tih kan hriat a tha hle.
Tin, tunlaiah social media a than nasat avang leh awlsamtea chanchin thar kan chhiar theih tak avang hian Print Media leh TV news lam te a tlahniam hle tih sawi a ni fo. Hei hi a chhan nia lang chu mipui ten sum sen kan hreh avang a ni pakhat a. News siamtu ten sum leh tha senga news an siam leh an buaipuite hi ngaihhlut sak nachang kan hriat a, a phu tawk a man kan pek ve hi hreh loh tur a ni. Social Media news hi nakin zelah document atan a tling lova, print media erawh kum tam tak ral hnuah pawh document pawimawh tak a la ni reng thei a ni.
Tin, mahni tualchhung chanchinbu ngaihsan hi hnam fing zia a ni tih ka’n belh zawk teh ang.
Post a Comment